జగనే రాష్ట్ర మయం!

కడప ఎంపీ వైయస్ జగన్ ది విపరీత రాజయోగమని కొందరు జ్యోతిష పండితులు సెలవిచ్చారు. దాని పూర్తి భావం ఏమిటో తెలియదు కానీ ఒక విషయం నిజం. పెద్దగా చదువు లేకపోయినా, తండ్రి వైయస్ అంత కష్టపడకపోయినా విజయనగర సామ్రాజ్యమంత వ్యాపార సామ్రాజ్యం అతని సొంతమైంది. తండ్రి బతికి ఉన్నప్పుడే ఆ సామ్రాజ్య నిర్మాణం జరిగింది. మీడియా, సిమెంట్, ఇనుము, రియల్ ఎస్టేట్ రంగాలకు ఆ సామ్రాజ్యం విస్తరించింది.

ఇప్పుడు జగన్ సినిమా ఫైనాన్స్ రంగంలోకి, ఆ తర్వాత నేరుగా సినిమా నిర్మాణ రంగంలోకి ప్రవేశించనున్నారు. హీరోల రెమ్యూనరేషన్లకే ఏడెనిమిది కోట్ల రూపాయలు తగలెయ్యడం ఇష్టం లేని జగన్నాయకులు ఇటీవల నిర్మాతల మండలితో హీరోల రెమ్యూనరేషన్ల మీద శ్లాబ్ విధింపజేసినట్టు తెలుస్తోంది. జగన్ బాలకృష్ణ అభిమాని అన్న విషయం చాలా మందికి తెలియదు. బాలకృష్ణ రెండుకోట్ల లోపే పారితోషికం తీసుకుంటూ నిర్మాతల హీరోగా పేరు తెచ్చుకున్నారు. రెమ్యూనరేషన్ల విషయంలో కూడా బాలకృష్ణ జగన్ కు నచ్చినట్టు చెబుతున్నారు. ఇన్ని రంగాలకు విస్తరించిన జగన్ కు అన్నిటా విజయం కలగాలని వైయస్ అభి మానులు కోరుకుంటున్నారు. జగమే రామమయం అన్నట్టు జగనే రాష్ట్ర మయం అంటే బాగుంటుందేమో!