కెసిఆర్, విజయశాంతి చెరో వైపు

By Srinivas

Published: Thursday, October 20, 2011, 15:02 [IST]

తెలంగాణ కోసం ఉద్యమిస్తున్న తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, మెదక్ పార్లమెటు సభ్యురాలు జాతీయ స్థాయిలో చెరో పార్టీ వైపు మొగ్గుతున్నట్లు స్పష్టంగా కనిపిస్తోంది. తెరాసలో కెసిఆర్, విజయశాంతి ప్రధాన నేతలు. కానీ కెసిఆర్ కాంగ్రెసు వైపు మొగ్గినట్లుగా కనిపిస్తుంటే విజయశాంతి భారతీయ జనతా పార్టీ వైపు ఉంటూ వస్తున్నారు. పార్టీలో ఇద్దరూ ప్రధాన నేతలే అయినప్పటికీ మొదటి నుండి వారి వ్యవహార శైలి ఇలాగే ఉంది. 2009 సాధారణ ఎన్నికల సమయంలో ఎన్డీయే అధికారంలోకి వస్తుందనే ఉద్దేశ్యంతో కెసిఆర్ ఒకే ఒక్కసారి వారి బహిరంగ సభలో పాల్గొన్నారు. ఆ తర్వాత ఎప్పుడూ ఆయన బిజెపి వైపు చూడలేదు. అంతేకాదు పలుమార్లు తెలంగాణ ఇచ్చేది కాంగ్రెసు పార్టీయే కాబట్టి కాంగ్రెసును బలోపేతం చేయాలని, తెలంగాణ ఇస్తే కాంగ్రెసులో టిఆర్ఎస్‌ను విలీనం చేసేందుకు సిద్ధంగా ఉన్నామని కెసిఆర్ చెప్పినట్లు వాదనలు వచ్చాయి.

అదే సమయంలో విజయశాంతి నిత్యం కాంగ్రెసుపై ధ్వజమెత్తుతారు. ఆమె కాంగ్రెసును సపోర్టు చేసిన సందర్భాలు ఒక్కటంటే ఒక్కటీ లేవు. కెసిఆర్ అప్పుడప్పుడు తెలంగాణ ఇస్తుందనే విశ్వాసాన్ని వ్యక్తం చేస్తారు. కానీ విజయశాంతి కాంగ్రెసు ఉంటే తెలంగాణ రానే రాదని కొట్టి పారేస్తుంది. అంతేకాదు ఇటీవల ఓ కార్యక్రమంలో ఆమె కెసిఆర్ అమాయకంగా కాంగ్రెసును నమ్ముతున్నారన్నట్లు వార్తలు వచ్చాయి. తెలంగాణపై బిజెపి స్పష్టంగా ప్రకటించినప్పటికీ కెసిఆర్ అద్వానీ యాత్ర రాష్ట్రానికి వచ్చినప్పుడు మిన్నకుండి పోయారు. కానీ రాములమ్మ అద్వానీకి స్వాగతం పలికారు.

Published On October 20, 2011