జగన్‌కు టిఆర్ఎస్ మద్దతిస్తుందా?: కాంగ్రెస్ టెన్షన్

By Srinivas

Published: Friday, February 24, 2012, 9:23 [IST]

కాంగ్రెసు పార్టీలో రాజ్యసభ టెన్షన్ ప్రారంభమైనట్లుగా కనిపిస్తోంది. మరికొద్ది రోజుల్లో రాజ్యసభ ఎన్నికలు జరగనున్నాయి. వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి కూడా రాజ్యసభ పోటీలో తన అభ్యర్థిని నిలిపేందుకు రంగం సిద్ధం చేసుకుంటున్నారు. జగన్ వర్గంలో ఇప్పటికే పంతొమ్మిది మంది శాసనసభ్యులు ఉన్నారు. వీరికి తెలంగాణ రాష్ట్ర సమితి ఎమ్మెల్యేలు కూడా మద్దతిస్తే జగన్ రాజ్యసభ సీటును కైవసం చేసుకోవడం ఖాయం. ఈ నేపథ్యంలో కాంగ్రెసు పార్టీ నేతలు పలువురు ఆయా పార్టీలలోని సన్నిహితుల వద్ద రాజ్యసభ సీటు, మద్దతుపై ఆరా తీస్తున్నారట. జగన్ అభ్యర్థిని నిలబెడతారా? టిఆర్ఎస్ అభ్యర్థులు వారికి మద్దతిస్తారా? అని కూపీలాగుతున్నారట. టిఆర్ఎస్ మద్దతిచ్చిన పక్షంలో జగన్ సీటు ఎగరేసుకు వెళుతున్నారని వారు అభిప్రాయపడుతున్నారు. అంతేకాదు టిఆర్ఎస్ మాత్రమే కాకుండా అధికార కాంగ్రెసులోని కొందరు శాసనసభ్యులకు జగన్ ఎర వేస్తున్నారని అంటున్నారు.

అయితే టిఆర్ఎస్ మాత్రం రాజ్యసభ సీటు విషయంలో జగన్‌కు మద్దతిచ్చేందుకు సిద్ధంగా లేనట్లుగా కనిపిస్తోందని అంటున్నారు. తెలంగాణ విషయంలో జగన్‌కు, తెలుగుదేశం పార్టీకి పెద్దగా తేడా ఏమీ లేదని ఇలాంటి సమయంలో జగన్‌కు మద్దతిస్తే ఇటు తెలంగాణవాదుల్లో విశ్వాసం కోల్పోవడంతో పాటు విపక్షాలకు అవకాశం ఇచ్చినట్టవుతుందని టిఆర్ఎస్ నేతలు కొందరు చెబుతున్నారట. ఇప్పటికే ఎమ్మెల్సీ ఎన్నికల సమయంలో తమ పార్టీ ఎమ్మెల్యేలు కాంగ్రెసుకు మద్దతివ్వడం వల్ల పార్టీకి నష్టం చేకూరిందని ఇప్పుడు జగన్‌కు మద్దతిస్తే అది మరింత నష్టం చేస్తుందని టిఆర్ఎస్ భావిస్తోందంట. అయితే జగన్ మాత్రం తన టిఆర్ఎస్ మద్దతు కోసం తన ప్రయత్నాలు చేస్తున్నారని అంటున్నారు.

Published On February 24, 2012