టిడిపి నేతలకు బాలకృష్ణ ఝలక్?

By Srinivas

Published: Thursday, January 19, 2012, 10:15 [IST]

వచ్చే ఎన్నికల్లో తాను పార్లమెంటు స్థానానికి పోటీ చేయనని, అసెంబ్లీ స్థానానికే పోటీ చేస్తానని చెప్పడం ద్వారా తెలుగుదేశం పార్టీ నేతలకు హీరో నందమూరి బాలకృష్ణ షాక్ ఇచ్చారనే అభిప్రాయం వ్యక్తమవుతోంది. రెండు రోజుల క్రితం టిడిపి నేతలు బాలకృష్ణ రాజకీయ ఆరంగేట్రం టిడిపికి లాభిస్తుందని, ఆయన విజయవాడ పార్లమెంటు సభ్యుడు లగడపాటి రాజగోపాల్‌పై పోటీ చేసి ఆయనను ఓడించాలని, బాలయ్య అక్కడ నుండి పోటీ చేస్తే చుట్టూ నాలుగైదు జిల్లాల్లో కూడా ప్రభావం ఉంటుందని అభిప్రాయపడ్డారు. అయితే బుధవారం ఇదే ప్రశ్నను విలేకరులు అడగ్గా తాను ఎంపీగా పోటీ చేయనని, అసెంబ్లీ స్థానానికే పోటీ చేస్తానని అయితే ఎక్కడి నుండి అనేది పార్టీ అధిష్టానమే నిర్ణయిస్తుందని చెప్పారు.

అయితే బాలయ్య వ్యాఖ్యలపై టిడిపిలో చర్చకు దారి తీసినట్లుగా తెలుస్తోంది. ఇప్పటి వరకు ఎక్కడి నుండి పోటీ చేస్తారనే చర్చ జరిగేది. కానీ ఇప్పుడు ఆయన వ్యాఖ్యల వెనుక వ్యూహమేమిటనే సర్వత్రా చర్చ జరుగుతోంది. పార్టీలో ఇప్పటి వరకు చంద్రబాబే కేంద్రంగా ఉన్నారు. బాలయ్య రాష్ట్ర రాజకీయాలకే పరిమితమైతే ఆయన రెండో పవర్ సెంటర్‌గా తయారవుతారనే అభిప్రాయాలు వ్యక్తమవుతున్నాయి. టిడిపిలో నందమూరి కుటుంబానికి కూడా ప్రాధాన్యత తీసుకు వచ్చే ఉద్దేశ్యంలో భాగంగానే ఆయన అసెంబ్లీకి పోటీ చేస్తానని వ్యాఖ్యానించారని కొందరు అభిప్రాయపడుతుండగా, టిడిపికి లబ్ధి చేకూర్చేందుకే అని మరికొందరు అభిప్రాయపడుతున్నారు. రాజకీయాలపై ఆచితూచి మాట్లాడుతున్న బాలయ్య పోటీ విషయంలో మాత్రం పార్టీ నేతల అభిప్రాయాలను వెంటనే కొట్టి పారేయటం గమనార్హం.

Published On January 19, 2012