ఛలో యార్!: ఎయిర్ హోస్టెస్‌తో అసభ్యకరంగా, అరెస్ట్

ముంబై: జెట్ ఎయిర్ వేస్ ఎయిర్ హోస్టెస్‌ను వేధించినందుకు, ఆమెతో కలిసి సెల్ఫీ దిగేందుకు ఒత్తిడి చేసినందుకు ఓ వ్యక్తిని పోలీసులు అరెస్టు చేశారు. అంతేకాదు, సదరు వ్యక్తి టాయిలెట్లో స్మోకింగ్ చేసి ఎయిర్ క్రాఫ్ట్ నిబంధనలను ఉల్లంఘించాడు.

మహమ్మద్ అబూబకర్ (29) జెట్ ఎయిర్ వేస్ విమానంలో ప్రయాణిస్తున్నాడు. అతనికి ఎయిర్ హోస్టెస్‌తో సెల్ఫీ దిగాలనిపించింది. అడిగితే, ఆమె నిరాకరించింది. దీంతో ఆమె వెనకాలే వెళ్లి వేధించాడు. దీంతో ఇబ్బందిపడిన ఆమె కేకలు వేసింది. వెంటనే క్రూ సిబ్బంది వచ్చారు.

వారిని చూసిన అబూబకర్ వెంటనే టాయిలెట్‌లోకి వెళ్లి సిగరెట్ కాల్చి బయటకు వచ్చాడు. ఈ ఘటనపై సిబ్బంది, ఎయిర్ హోస్టెస్ పోలీసులకు ఫిర్యాదు చేశారు. అతని పైన పలు సెక్షన్ల కింద కేసులు నమోదు చేసిన ముంబై పోలీసులు అతడిని అదుపులోకి తీసుకుని జ్యుడీషియల్ కస్టడీకి తరలించారు.

సెక్యూరిటీ చెక్‌ను తప్పించుకుని అబూబకర్ విమానంలోకి సిగరెట్, లైటర్ ఎలా తీసుకురాగలిగాడన్న విషయంపై దర్యాప్తు జరపనున్నట్లు తెలిపారు. అతడి సెల్‌ఫోన్‌ను స్వాధీనం చేసుకున్నారు. నిందితుడు గుజరాత్‌వాసి అని తెలుస్తోంది. సౌదీ అరేబియాలోని ఓ హోటల్‌లో పని చేస్తున్నాడు.

ఆ విమానం దమామ్ - ముంబై విమానం. విమానం ముంబైలోని ఛత్రపతి శివాజీ అంతర్జాతీయ విమానాశ్రయంలో దిగగానే పోలీసులు అతనిని అదుపులోకి తీసుకున్నారు. బాధిత ఎయిర్ హోస్టెస్ మాట్లాడుతూ... తాను నడుస్తుండగా నిందితుడు అబూబకర్ వచ్చి తన చేయి పట్టుకున్నాడని, చలో యార్, ఓ సెల్ఫీ తీసుకుందామని అన్నాడని చెప్పారు. ప్రయాణంలో అతను తనతో అసభ్యంగా ప్రవర్తించాడని చెప్పారు.

తన వెనుక ఎవరో ఫాలో అవుతున్నట్లుగా గుర్తించానని, అప్పటి నుంచి తనకు అతని నుంచి వేదన ప్రారంభమైందని చెప్పారు. తాను నడుస్తుండగా తన వెనుకాలే వచ్చాడని చెప్పింది. అంతేకాదు, తన భుజంపై బలవంతంగా చేయి వేసి, ఓ సెల్ఫీ తీసుకునే ప్రయత్నం చేశాడని చెప్పారు.

English summary

A man from Gujarat was arrested on Monday for molesting a Jet Airways air hostess and taking a selfie against her will. Mohammed Abubakar (29) allegedly further violated aircraft rules by smoking in the toilet. He was arrested after the Damam-Mumbai flight landed at Chhatrapati Shivaji International Airport (CSIA).