కొత్త కారుతో క్యాన్సర్ వచ్చే ఛాన్స్; ఆరోగ్యం విషయంలో షాకింగ్ అప్డేట్!!

కొత్త కారు కొంటున్నారా? అయితే మీ ఆరోగ్యం విషయంలో జాగ్రత్త అంటున్నారు వైద్య నిపుణులు. కొత్త కారు కొనుగోలు చేసేవారు కారు నుండి వచ్చే వాసన పీలిస్తే క్యాన్సర్ వచ్చే అవకాశం ఎక్కువగా ఉంటుందని చెబుతున్నారు.

ప్రస్తుతం మనం పీల్చే గాలిలోనే ఎన్నో హానికరమైనటువంటి విషవాయువులు ఉంటున్నాయి. ఇవి మన ఆరోగ్యాన్ని పాడు చేస్తున్నాయి. ఇవి మాత్రమే కాదు మనం ఉపయోగించే కొత్త వస్తువులలో రకరకాల హానికరమైన విష పదార్థాలు ఉంటాయి. ముఖ్యంగా కొత్త కార్లలో కారు లోపల ఉండే వాసన ఆరోగ్యానికి మరీ డేంజర్ అని చెబుతున్నారు వైద్య నిపుణులు.

సాధారణంగా కార్లు, ట్రక్కులు వంటివి తయారు చేసే సమయంలో ఆఫ్ గ్యాసింగ్ అనే ప్రక్రియను ఉపయోగిస్తారు. దీనివల్ల అనేక రకాల కెమికల్స్ విడుదలవుతాయి. ఇక ఈ కెమికల్స్ వాసన మనం కొనుగోలు చేసిన తర్వాత కూడా కొత్త కార్లలో వస్తూ ఉంటుంది. అందుకే కొత్త కార్లలో ప్రయాణం చేసేవారు కార్ గ్లాసులు ఎక్కించి ఆ వాసనను పీలుస్తూ ప్రయాణం చేసే బదులు, గ్లాసులు దించుకుని ప్రయాణం చేయడం మంచిదని సూచిస్తున్నారు.

కారు లోపల ఉండే వాసనలో 20 రకాల కెమికల్స్ ఉంటాయని, అందులో క్యాన్సర్ కు కారణం అయ్యే ఫార్మాల్డిహైడ్ అనే కెమికల్ చాలా ప్రమాదకర స్థాయిలో ఉంటుందని చెబుతున్నారు. కొత్త కార్లలో ఫార్మాల్డిహైడ్ శాతం మామూలుగా ఉండవలసిన దానికంటే, మూడు రెట్లు ఎక్కువగా ఉంటుందని అది విషంతో సమానం అని చెబుతున్నారు. ఎక్కువసేపు కొత్త కార్లను డ్రైవ్ చేసేవారిపై దీని ప్రభావం కచ్చితంగా ఉంటుందని హెచ్చరిస్తున్నారు.

ఇక వాతావరణం వేడిగా ఉంటే దీని ప్రభావం మరింత ఎక్కువగా ఉంటుందని చెబుతున్నారు. కొత్త కార్లను కొనుగోలు చేసిన తర్వాత కార్ లో వచ్చే వాసన వల్ల కొంతమందికి తలనొప్పి రావడం, కడుపులో తిప్పడం, ఊపిరి సరిగా అందకపోవడం వంటి సమస్యలు ఎదురవుతాయని శాస్త్రవేత్తలు ఇప్పటికే పేర్కొన్నారు.

ఇక క్యాన్సర్ వచ్చే అవకాశం కూడా ఉందని హెచ్చరిస్తున్న నేపథ్యంలో కొత్త కార్ల విషయంలో జాగ్రత్త అవసరం. వాటిల్లో ప్రయాణించే సమయంలో లోపల ఉన్న వాసన పూర్తిగా పోయేదాకా గ్లాసులు దించుకోవడం ఉత్తమం. ఏది ఏమైనా కొత్త కార్లను కొనుగోలు చేసేవారు ఈ విషయంలో జాగ్రత్తలు తీసుకొని ఆరోగ్యాన్ని కాపాడుకోవాలి.

English summary

Buying a new car? In a shocking update on health, scientists have found that car smell can cause cancer.