జన్మ నక్షత్రం అశ్వని, భరణి, కృత్తిక ఉన్నవారి ఏప్రిల్ నెల జాతక ఫలం

తెలుగు సంప్రదాయం, వేద జ్యోతిష్య శాస్త్రం ప్రకారం జన్మ నక్షత్రానికి అత్యంత ప్రాధాన్యత ఉంది. ఒక వ్యక్తి పుట్టినప్పుడు చంద్రుడు ఏ నక్షత్రంలో ఉంటే, దాన్నే ఆ వ్యక్తి 'జన్మ నక్షత్రం' అని పిలుస్తారు. జాతక చక్రం మొత్తం ఈ జన్మ నక్షత్రం ఆధారంగానే నిర్మించబడుతుంది. జ్యోతిష్య శాస్త్రం ప్రకారం చంద్రుడు మనస్సుకు అధిపతి. కాబట్టి, పుట్టినప్పుడు చంద్రుడు ఉన్న నక్షత్రం ఆ వ్యక్తి ఆలోచనా తీరును, ప్రవర్తనను, స్వభావాన్ని నిర్ణయిస్తుంది. మనకు తెలుగులో 27 నక్షత్రాలున్నాయి. ఇవి కాకుండా ఉత్తరాషాఢ, శ్రవణా నక్షత్రాల మధ్య సూక్ష్మమైన అభిజిత్ నక్షత్రం ఉంటుంది. శుభ ముహూర్తాల కోసం దీన్ని పరిగణనలోకి తీసుకుంటారు. నక్షత్రం మాత్రమే మొత్తం జాతకాన్ని నిర్ణయించదు. జాతక చక్రంలో ఉండే లగ్నం, ఇతర గ్రహాల స్థితి , అవి ఇచ్చే దృష్టి కూడా ఫలితాలను మారుస్తాయి. అందుకే నక్షత్రాన్ని జాతకానికి పునాదిగా తీసుకుంటారు.

అశ్విని నక్షత్రం (మేష రాశి 1, 2, 3, 4 పాదాలు)

అశ్విని నక్షత్ర జాతకులకు ఏప్రిల్ నెల మిశ్రమ ఫలితాలను ఇస్తుంది. ఉద్యోగస్తులకు పని ఒత్తిడి ఎక్కువగా ఉంటుంది. తోటి ఉద్యోగులతో చిన్నపాటి గొడవలు తలెత్తుతాయి. మౌనంగా ఉండటం మంచిది. అనవసర ఖర్చులు ఉన్నాయి. పొదుపుపై దృష్టి పెట్టాలి. పాత బాకీలు వసూలు కావడంలో ఆలస్యమవుతుంది కాబట్టి ఆందోళన పడాల్సిన అవసరంలేదు. రక్తపోటు లేదా తలనొప్పి వంటి చిన్నపాటి ఆరోగ్య సమస్యలు ఉంటాయి. తగినంత విశ్రాంతి తీసుకోవాలి. మంగళవారం నాడు సుబ్రహ్మణ్య స్వామికి అభిషేకం చేయడం లేదా అష్టోత్తరం చదువుకోవడం దోషాలను పోగొడుతుంది.

భరణి నక్షత్రం (మేష రాశి 1, 2, 3, 4 పాదాలు)

భరణి నక్షత్రం వారికి ఈ నెల సానుకూల మార్పులు కనిపిస్తున్నాయి. ఉద్యోగస్థులకు కొత్త అవకాశాలు తలుపు తడతాయి. వ్యాపారస్తులకు లాభాలున్నాయి. ముఖ్యంగా కళల రంగంలో ఉన్నవారికి, ఐటీ రంగం వారికి మంచి గుర్తింపు లభిస్తుంది. ఆదాయ మార్గాలు మెరుగుపడతాయి. విలాసవంతమైన వస్తువుల కొనుగోలుపై ఆసక్తి చూపుతారు. కుటుంబ సభ్యుల నుండి కూడా వీరికి ఆర్థిక సహకారం అందుతుంది. ఆహార నియమాలు పాటించాలి. లేదంటే గ్యాస్ట్రిక్ సమస్యలు వస్తాయి. లక్ష్మీ అష్టోత్తరం చదవడం, శుక్రవారం పేదలకు తీపి పదార్థాలు పంపిణీ చేయడం శుభ ఫలితాలనిస్తుంది.

కృత్తిక నక్షత్రం (మేష రాశి 1వ పాదం & వృషభ రాశి 2, 3, 4 పాదాలు)

కృత్తిక నక్షత్రం వారు ఈ నెల కొంచెం జాగ్రత్తగా ఉండాలి. ఉద్యోగస్థులకు అధికారుల నుండి ఒత్తిడి ఉంటుంది. పనుల్లో ఆటంకాలు ఎదురైనా పట్టుదలతో పూర్తి చేస్తారు. వృషభ రాశిలో ఉన్న వారు బదిలీ అవుతారు. భూ సంబంధిత లావాదేవీలు ఒక కొలిక్కి వస్తాయి. అయితే, పెద్ద మొత్తంలో పెట్టుబడులు పెట్టేటప్పుడు అనుభవజ్ఞులు, గురువు, కుటుంబ సభ్యుల సలహాలు తీసుకొని పెట్టడం ఉత్తమం. కంటి జబ్బులు లేదా చర్మ సమస్యలు రావడానికి అవకాశం ఉంది. నీరు ఎక్కువగా తీసుకోవాలి. ప్రతిరోజూ 'ఆదిత్య హృదయం' చదవడంవల్ల ఆత్మవిశ్వాసం పెరిగి పనుల్లో విజయం సాధిస్తారు.

English summary

April Month is favorable in all respects for those born under the Ashwini, Bharani, or Krittika birth stars. However, they should exercise caution regarding their health.