బాలకృష్ణ ప్రచారయాత్ర డైరీ

హైదరాబాద్: బాలయ్య పూర్తి స్ధాయిలో పార్టీ ప్రచారానికి నడుం బిగించనున్నారు. అందుకోసం ఆయన పకడ్బందీ ప్రణాళికతో ముందుకు వెళ్ళనున్నారు. బాలయ్య ఈ నెల 29న అనంతపురం జిల్లా హిందూపురం నుంచి ప్రచారం ప్రారంభించనున్నారు. అందుకోసం 28న హైదరాబాద్‌నుంచి బయలుదేరి బెంగళూరుకు వెళ్లి అక్కడినుంచి హిందూపురం చేరుకుంటారు. 29, 30 తేదీల్లో అనంతపురం జిల్లాలలోనూ, 31, ఫిబ్రవరి 1 తేదీల్లో కర్నూలు జిల్లాలోనూ ఆయన యాత్ర జరుగుతుంది. అనంతరం ఉత్తరాంధ్ర జిల్లాల్లో పర్యటిస్తారు. 3, 4 తేదీల్లో శ్రీకాకుళం, 5, 6న విజయనగరం, 7న విశాఖపట్నంలో ప్రచారయాత్ర ఉంటుంది.

ఆదివారం చంద్రబాబు ఇంట్లో బాబుతోపాటు హరికృష్ణ, బాలకృష్ణ, జూనియర్‌ ఎన్టీఆర్‌, కల్యాణ్‌రామ్‌లు సమావేశమయ్యారు. బాలయ్య యాత్ర ఎలా ఉండాలన్న దానిపై వారిమధ్య కొంతసేపు చర్చ జరిగిందని సమాచారం. ఆ సమావేశంలో ప్రచారయాత్ర రోడ్డుషోల రూపంలో ఉండాలని నిర్ణయించారు. తొలి విడత పర్యటన ముగిశాక కొన్ని రోజుల విరామం అనంతరం కోస్తా జిల్లాల్లో పర్యటించాలన్న అభిప్రాయం వ్యక్తమైంది. జూనియర్‌ ఎన్టీఆర్‌ ప్రచారంలోకి దిగితే ఒక్కొక్కరు ఒక్కో ప్రాంతంలో పర్యటిస్తే బాగుంటుందని వారు అభిప్రాయపడ్డారు.