సినీ నటి ఆసిన్ పై పోలీసు కేసు

చెన్నయ్: ప్రముఖ సినీనటి ఆసిన్‌ మరో వివాదంలో చిక్కుకుంది. తన కుమారుణ్ని ఆసిన్‌, ఆమె తండ్రి నిర్బంధించారని ఆమె వద్ద సహాయకుడిగా పనిచేసిన ఓ వ్యక్తి తల్లి పోలీసులను ఆశ్రయించింది. వివరాలు ఇలా ఉన్నాయి-తూత్తుకుడి జిల్లా శ్రీవైకుంఠం సమీపంలోని పేరూర్‌ గ్రామానికి చెందిన నల్లముత్తుకుమార్‌ (27) ఆసిన్‌ వద్ద సహాయకుడిగా పనిచేస్తున్నాడు. కొద్ది నెలల కిందట ఆసిన్‌ ఆహ్వానం మేరకు ముంబాయి వెళ్లాడు. ప్రతి రోజూ తల్లికి ఫోన్‌చేసి మాట్లాడే నల్లముత్తుకుమార్‌ నెలన్నరగా ఫోన్లు చేయడంలేదు. అతనితో మాట్లాడేందుకు కుటుంబీకులు ప్రయత్నించినా ఫలితం లేకపోయింది. దీంతో అతడి తల్లి సుడలై వడివు కుమారుడి ఆచూకీ కోసం ఆసిన్‌ తండ్రి జోసఫ్‌ ను సంప్రదించింది.

ముత్తుకుమార్‌ తమ వద్ద పనిచేయడం మానేసి రెండు నెలలైందని, జనవరి 21వ తేదీన సెటిల్‌మెంట్‌ చేసుకొని వెళ్లిపోయాడని ఆయన చెప్పాడు. దీనితో తన కుమారుడి ఆ చూకీ తెలపాలంటూ సుడలై వడివు పోలీసులకు ఫిర్యాదు చేసింది. తన కుమారుణ్ని ఆసిన్‌, ఆమె తండ్రి నిర్బంధించి హింసిస్తున్నారని, అతను ఉద్యోగం మానేశాడని అబద్దమాడుతున్నారని ఫిర్యాదులో పేర్కొంది. కేసు నమోదు చేసిన పోలీసులు విచారణ కోసం ముంబాయి వెళ్లారు.