బాబు దగాపై సిపిఎం కత్తికి పదును

హైదరాబాద్: మహాకూటమి పార్టీల మధ్య సీట్ల సర్దుబాటు అయిందనే తెలుగుదేశం పార్టీ అధినేత నారా చంద్రబాబు నాయుడు ప్రకటనపై సిపిఎం కత్తులు నూరుతోంది. మంగళవారం ఉదయం 11 గంటలకు చంద్రబాబు నివాసంలో తలపెట్టిన మహాకూటమి సమావేశానికి హాజరు కాకూడదని సిపిఎం నిర్ణయించుకుంది. సీట్ల సర్దుబాటు ఏకపక్ష నిర్ణయాన్ని ప్రకటించడంపై నిరసన వ్యక్తం చేస్తూ సిపిఎం రాష్ట్ర కార్యదర్శి బివి రాఘవులు తెలుగుదేశం పార్టీ అధ్యక్షుడు నారా చంద్రబాబునాయుడికి లేఖ రాశారు. మహాకూటమి పార్టీల మధ్య సీట్ల సర్దుబాటు పూర్తి కాలేదని సిపిఎం వాదిస్తోంది. తాము 14 శాసనసభా స్థానాలకు, రెండు పార్లమెంటు స్థానాలకు అంగీకరించినట్లు వచ్చిన వార్తలో నిజం లేదని సిపిఎం నాయకుడు వీరయ్య మీడియా ప్రతినిధులతో చెప్పారు.

తెలుగుదేశం పార్టీ వైఖరి వల్లే మహాకూటమి సీట్ల సర్దుబాటు విషయంలో గందరగోళం చోటు చేసుకుందని ఆయన విమర్శించారు. మహాకూటమి పార్టీల మధ్య సీట్ల సర్దుబాటుపై ఏకాభిప్రాయం కుదరలేదని ఆయన అన్నారు. తాము 18 శాసనసభా స్థానాలను అడిగామని, తాము 16 సీట్లకు అంగీకరించినట్లు చంద్రబాబు తొలుత ప్రకటించడం అబద్ధమని ఆయన అన్నారు. ఈ విధంగా ఎప్పటికప్పుడు మహాకూటమి పార్టీల మధ్య సీట్ల సర్దుబాటు జరిగిందని తెలుగుదేశం ప్రకటిస్తూ వస్తుండడం వల్ల గందరగోళం చోటు చేసుకుంటోందని ఆయన విమర్శించారు.