అల్లు అరవింద్ పడిగాపులు

హైదరాబాద్: పార్టీకి రాజీనామా చేయడానికి సిద్ధపడిన పరకాల ప్రభాకర్ ను బుజ్జగించడానికి ఆయన ఇంటికి వచ్చిన ప్రజారాజ్యం పార్టీ నేత అల్లు అరవింద్ కు చుక్కెదురయింది. పరకాల ప్రభాకర్ ఇంట్లో ఆయన గురువారం మధ్యాహ్నం 12 గంటల వరకు గంటకు పైగా కూర్చుని ఉండిపోయారు. పరకాల ప్రభాకర్ అల్లు అరవింద్ ను కలవడానికి నిరాకరిస్తున్నారు. పార్టీని వీడిపోవడానికే పరకాల నిశ్చయించుకున్నట్లు సమాచారం.

తాను ప్రజారాజ్యం పార్టీకి రాజీనామా చేస్తున్నట్లు పరకాల ప్రభాకర్ మధ్యాహ్నం 12 గంటలకు ప్రకటించాల్సి ఉంది. దాంతో అల్లు అరవింద్ ఆయన ఇంటికి వచ్చారు. ప్రజారాజ్యం పార్టీ సంస్థాగత వ్యవహారాల్లో మొదటి నుంచీ పాలు పంచుకున్న ఆంజనేయరెడ్డి ఇప్పటికే పార్టీ నుంచి వెళ్లిపోయారు. ఇప్పుడ పరకాల ప్రభాకర్ కూడా రాజీనామాకు సిద్ధపడ్డారు. పరకాల ప్రభాకర్ నర్సాపురం లోకసభ స్థానాన్ని ఆశించారు. టిక్కెట్ల పంపకంలో జరిగిన వ్యవహారాన్ని నిరసిస్తూ ఒక్కరొక్కరే వెళ్లిపోతుండడం ప్రజారాజ్యం పార్టీకి తలనొప్పిగా మారింది.