నేపాల్‌ ప్రధాని రాజీనామా

ఖట్మాండు: నేపాల్‌ ప్రధాన మంత్రి పదవికి ప్రచండ రాజీనామా చేశారు. దీంతో ఎనిమిది నెలల సంకీర్ణ ప్రభుత్వం కుప్పకూలింది. ఆర్మీ చీఫ్‌ రుక్మాంగద్‌ కతావల్‌ను ప్రచండ తొలగించడంతో దేశంలో రాజకీయ సంక్షోభం ఏర్పడింది. అయితే ప్రధాని నిర్ణయాన్ని ప్రతిపక్షాలు, ప్రభుత్వ భాగస్వామ్య పార్టీలతో పాటు అధ్యక్షుడు రామ్‌ భరణ్‌ యాదవ్‌ వ్యతిరేకించారు. ఆర్మీ చీఫ్‌గా కతావల్‌ కొనసాగేందుకు గ్రీన్‌ సిగ్నల్‌ ఇచ్చారు. దీనికి నిరసనగా ప్రచండ తన పదవికి రాజీనామా చేశారు. ఆర్మీ చీఫ్‌ తొలగించడాన్ని అధ్యక్షుడు రామ్‌భరణ్‌ ఏకపక్షంగా తిరష్కరించారని ప్రచండ అన్నారు.

ప్రజాస్వామ్య వ్యతిరేఖ శక్తులన్నీ చేతులు కలిపాయి...అందుకే రాజీనామా చేసినట్లు ప్రచండ ప్రకటించారు. తన ఎనిమిది నెలల పాలనలో ప్రజాస్వామ్యాన్ని రక్షించే చర్యలు తీసుకున్నానని వెల్లడించారు. నేపాల్‌లో శాంతి భద్రతలు రక్షించాలని ఆర్మీకి ఆయన విన్నవించారు. మరోవైపు యూఎంఎల్‌ నాయకత్వంలో కొత్త సంకీర్ణ ప్రభుత్వం ఏర్పాటుకు నేపాలీ కాంగ్రెస్‌ ప్రయత్నాలు చేస్తొంది. 601 పార్లమెంట్‌ సీట్లున్న నేపాల్‌లో ప్రచండ సారథ్యంలోని మావోయిస్టు పార్టీకి 229 సీట్లు ఉన్నాయి.