ఢిల్లీలో చక్రం తిప్పుతా: జయ

చెన్నై: ఎన్నికల ఫలితాల తర్వాత ఢిల్లీలో తానూ చక్రం తిప్పుతానని అన్నాడియంకె నేత జయలలిత అన్నారు. చెన్నైలోని స్టెల్లా మేరీ స్కూల్లో ఆమె బుధవారం తన ఓటు హక్కును వినియోగించుకున్నారు. పలు కూటములు తనను ఆహ్వానిస్తున్నాయని, ఎన్నికల ఫలితాల వెల్లడి తర్వాతనే ఏ నిర్ణయమైనా తీసుకుంటామని ఆమె మీడియా ప్రతినిధులతో చెప్పారు. మిత్రులతో చర్చించిన తర్వాతనే ఏ కూటమితో వెళ్లేదీ నిర్ణయం తీసుకుంటామని ఆమె చెప్పారు.

ఎన్నికల్లో డిఎంకె అక్రమాలకు పాల్పడుతోందని ఆమె విమర్శించారు. చాలా చోట్ల ఇవియంలు మొరాయిస్తున్నాయని ఆమె చెప్పారు. అన్నాడియంకెకు ఓటేస్తే డిఎంకెకు ఓటు పడుతోందని ఆమె అన్నారు. డిఎంకె గూండాలను ప్రజలు తరుముతున్నారని ఆమె అన్నారు. అత్యధిక లోకసభ స్థానాలు తామే దక్కించుకుంటామని ఆమె ధీమా వ్యక్తం చేశారు.