గడ్డంపై సైఫ్ అలీ క్షమాపణలు

ముంబై: సినిమా విడుదలకు రెండు రోజుల ముందు లవ్ ఆజ్ కల్ సినిమా నిర్మాత, నటుడు సైఫ్ అలీ ఖాన్ తన ట్రిమ్ చేసిన గడ్డంపై తలెత్తిన సమస్యను పరిష్కరించుకున్నాడు. ట్రిమ్ చేసిన గడ్డంతో సినిమాలో సైఫ్ కనిపించడంపై పంజాబ్ కల్చరల్ అండ్ హెరిటేజ్ బోర్డు తీవ్ర అభ్యంతరం తెలిపింది. దీంతో సినిమాపై వివాదం తలెత్తింది. ట్రిమ్ చేసిన గడ్డంతో సైఫ్ సిక్కుగా కనిపించడాన్ని బోర్డు వ్యతిరేకించింది. దీనిపై సైఫ్ క్షమాపణలు కోరాడు.

సైఫ్ చెప్పిన క్షమాపణలను బోర్డు అంగీకరించింది. బోర్డు డిమాండ్ మేరకు ఆ గడ్డంతో కనిపించే 15 సెకన్ల దృశ్యాన్ని సినిమా నుంచి తొలగిస్తున్నారు. యువతిని బుట్టలో వేసుకోవడానికి గురుద్వారాకు వెళ్లే సర్దార్ గా ఈ దృశ్యంలో సైఫ్ కనిపిస్తాడు. గురుద్వారా పవిత్ర స్థలమని, దాని పట్ల అగౌరవం తగదని, దాంతో బోర్డుకు సినిమాతో సమస్య తలెత్తిందని, తాను అగౌరవపరచడానికి ఉద్దేశించలేదని, అయినప్పటికీ దాన్ని సినిమా నుంచి తొలగిస్తామని ఆయన సైఫ్ వివరించారు.