మన వైఖరి మారలేదు: సోనియా

న్యూఢిల్లీ: భారత విదేశాంగ విధానంలో మార్పు లేదని, పాకిస్తాన్ పట్ల భారత్ వైఖరి కూడా మారలేదని కాంగ్రెసు అధ్యక్షురాలు సోనియా గాంధీ స్పష్టం చేశారు. భారత్ - పాక్ సంయుక్త ప్రకటనపై ప్రధాని డాక్టర్ మన్మోహన్ సింగ్ కు ఆమె తన పూర్తి మద్దతు ప్రకటించారు. సంయుక్త ప్రకటనపై పార్టీలో అయోమయం ఉండాల్సిన అవసరం లేదని ఆమె పార్టీ నాయకులకు సూచించారు. ఉగ్రవాద నిరోధానికి పాకిస్తాన్ నిర్దిష్టమైన చర్యలు తీసుకుంటేనే చర్చలు సాధ్యమవుతాయని ఆమె స్పష్టం చేశారు.

ముంబై దాడుల్లో పాత్ర ఉన్నవారిపై చర్యలు తీసుకుని, ఉగ్రవాద నిరోధం విషయంలో హామీలను నిలబెట్టుకుంటే తప్ప పాకిస్తాన్ తో చర్చలు జరగవని ఆమె అన్నట్లు కాంగ్రెస్ అధికార ప్రతినిధి మనీష్ తివారీ చెప్పారు. ఎన్నికల ప్రణాళికలో ఇచ్చిన హామీలను అన్నింటినీ అమలు చేస్తామని సోనియా చెప్పారు. ఎన్నికల ప్రణాళిక హామీలు ఏ విధంగా అమలు చేస్తున్నామనే విషయాన్ని మంత్రులు ఎప్పటికప్పుడు సమీక్షించుకోవాలని ఆమె సూచించారు. సహాయ మంత్రులకు కేబినెట్ మంత్రులు బాధ్యతలు అప్పగించాలని కూడా ఆమె చెప్పారు. రాష్ట్రాలకు వెళ్లినప్పుడు మంత్రులు కచ్చితంగా పార్టీ కార్యాలయాలను సందర్శించాలని ఆమె సూచించారు.