బాబుకేమీ తెలియదు: వైయస్

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడికి ఏమీ తెలియదని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. తనను కలిసి మీడియా ప్రతినిధులతో ఆయన బుధవారంనాడు మాట్లాడారు. రెఫరెండమంటే ఏమిటో చంద్రబాబుకు తెలియదని ఆయన అన్నారు. తాను రెఫరెండానికి సిద్ధమేనని, అయితే చంద్రబాబు హైదరాబాదులోనే రెఫరెండం కావాలంటున్నారని, తానేమో రాష్ట్ర మంతా జరగాలంటున్నానని ఆయన అన్నారు. చంద్రబాబు హైదరాబాద్ కార్పోరేషన్ ఎన్నికలని అంటుంటే తమ శాసనసభ్యులు కార్పోరేటర్ గా గెలువు చూద్దామని చంద్రబాబును అడుగుతున్నట్లు ఆయన తెలిపారు.

శాసనసభ, లోకసభ ఎన్నికల్లో అన్ని పార్టీలు కలిసి కూడా తమన ఓడించలేకపోయాయని ఆయన అన్నారు.కాంగ్రెసుకు 38 శాతం ఓట్లే వచ్చాయని చంద్రబాబు అంటున్నారని, తెలుగుదేశం కూటమి నాలుగు పార్టీలు కలిసి పోటీ చేసినా తమకన్నా 1.7 శాతం ఓట్లు తక్కువగా వచ్చాయని, దీని గురించి కూడా చంద్రబాబు మాట్లాడాలి కదా అని ఆయన అన్నారు. రాష్ట్రంలో రెండే పార్టీలుంటే ఏదైనా ఒక పార్టీకి 50 శాతానికి మించి ఓట్లు వస్తాయి కావచ్చునని ఆయన చెప్పారు.