అసెంబ్లీ స్పీకర్ కు చంద్రబాబు లేఖ

హైదరాబాద్: మీడియాపై ఆంక్షలు ఎత్తేయాలని ప్రతిపక్ష నాయకుడు నారా చంద్రబాబు నాయుడు శాసనసభ స్పీకర్ కిరణ్ కుమార్ రెడ్డిని కోరారు. ఈ మేరకు ఆయన మంగళవారం ఒక లేఖ రాశారు. శాససనభ ప్రాంగణంలో మీడియాపై విధించిన ఆంక్షలు సరైనవి కావని ఆయన అన్నారు. మీడియాపై ఆంక్షలు ప్రజాస్వామ్య స్ఫూర్తికి విరుద్ధమని ఆయన అభిప్రాయపడ్డారు. ఆంక్షలు విధించడం మీడియా స్వేచ్ఛను హరించడమేనని ఆయన అన్నారు.

శాసనసభ ఆవరణలో మీడియాపై మునుపెన్నడూ లేని విధంగా స్పీకర్ ఆంక్షలు విధించారు. మీడియా ప్రతినిధులు ఒక చోటు నుంచి మరో చోటికి కదిలే అవకాశం లేకుండా చేశారు. దీంతో వారు తీవ్రమైన ఇబ్బందులకు లోనవుతున్నారు. మూత్ర విసర్జన వంటి వాటికి కూడా మీడియా ప్రతినిధులు ఇబ్బంది పడే పరిస్థితులున్నాయి. దీంతో ఇతర ప్రతిపక్షాలు కూడా మీడియా విషయంలో ప్రభుత్వం అనుసరిస్తున్న వైఖరిని తప్పు పడుతున్నాయి.