అసెంబ్లీలో చిరు మూడో కన్ను

హైదరాబాద్: శాసనసభలో కాంగ్రెసు, తెలుగుదేశం పార్టీల వ్యవహారంపై ప్రజారాజ్యం పార్టీ నాయకుడు చిరంజీవి దృష్టి పెట్టారు. రాజకీయంగా రాష్ట్రంలో మూడో కన్ను తెరవడానికి తగిన ప్రాతిపదికను తయారు చేసుకుంటున్నారు. కాంగ్రెసు, తెలుగుదేశం పార్టీలను మినహాయించి ఆయన మిగతా రాజకీయ పార్టీల శాసనసభా పక్ష నేతలతో మంగళవారం సమావేశమయ్యారు. కాంగ్రెసు, తెలుగుదేశం పార్టీలు శాసనసభలో తమకు సమయం రాకుండా చూస్తున్నాయనే ఆవేదనతో ఆయన ఈ సమావేశం ఏర్పాటు చేశారు.

లోక్ సత్తా, సిపిఐ, సిపిఎం, తెలంగాణ రాష్ట్ర సమితి, బిజెపి శాసనసభా పక్ష నేతలతో ఆయన సమావేశమయ్యారు. చిన్న పార్టీలకు శాసనసభలో మాట్లాడే ఆవకాశం రావడం లేదనే అంశంపై వారి మధ్య చర్చ జరిగింది. శాసనసభలో మాట్లాడేందుకు ప్రధాన ప్రతిపక్షమైన తెలుగుదేశం పార్టీకే కాకుండా తమకు కూడా అవకాశం ఇవ్వాలని వారు డిమాండ్ చేశారు.