ఆస్ట్రేలియాలో ఉగ్రవాద దాడి కుట్ర భగ్నం

సిడ్నీ: ఆస్ట్రేలియాలో ఇస్లామిక్ ఉగ్రవాద దాడి కుట్రను భగ్నం చేశారు. ఆస్ట్రేలియా ఆర్మీ బరాక్ పై ఆత్మాహుతి దాడికి ప్రయత్నాలు సాగుతున్న ఇస్లామిక్ టెర్రరిస్టు సెల్ ను పోలీసులు మంగళవారం కనిపెట్టారు. దాదాపు 16 వేల మంది సోమాలి శరణార్థులు ఉంటున్న మెల్బోర్న్ ప్రాంతంలో 400 మందికి పైగా పోలీసులు 19 ఇళ్లలో సోదాలు నిర్వహించి, దాడికి యత్నిస్తున్నారనే అనుమానంతో కొంత మందిని అదుపులోకి తీసుకున్నారు.

తాము అదుపులోకి తీసుకున్నవారు సోమాలియాలోని ఆల్ షబాబ్ గ్రూపునకు చెందినవారై ఉంటారని యాక్టింగ్ ఫెడరల్ పోలీస్ చీఫ్ కమిషనర్ టోనీ నెగుస్ చెప్పారు. జనవరి నుంచి ఆ గ్రూపు సభ్యులు సిడ్నీలోని హోల్స్ వర్తీ బారాక్స్ పై, ఇతర సైనిక స్థావరాలపై నిఘా వేసినట్లు అనుమానిస్తున్నారు. తగిన సమయంలో చర్య తీసుకున్నామని నెగుస్ అంటున్నారు.