అస్ట్రేలియాలో భారత విద్యార్థి మృతి

మెల్బోర్న్: ఆస్ట్రేలియాలోని విక్టోరియా ప్రొవిన్స్ లో జరిగిన రోడ్డు ప్రమాదంలో భారత విద్యార్థి మృతి చెందాడు. విద్యార్థులు ప్రయాణిస్తున్న మినీ బస్సు చెట్టుకు ఢీకొట్టడంతో ఆదివారంనాడు ఈ ప్రమాదం సంభవించిందని పోలీసులు చెప్పారు. మరణించిన విద్యార్థిని ఇంకా గుర్తించాల్సి ఉంది. మినీ బస్సును అద్దెకు తీసుకుని పది మంది మౌంట్ బుల్లర్ కు ప్రయాణిస్తుండగా ఈ ఘోర ప్రమాదం సంభవించింది. భారత విద్యార్థి వీసా ఉన్న 22 ఏళ్ల యువకుడు అక్కడికక్కడే మరణించాడు.

ప్రమాదంలో మరో ఇద్దరు తీవ్రంగా గాయపడ్డారు. వారిని 200 కిలోమీటర్ల దూరంలో ఉన్న మెల్బోర్న్ ఆస్పత్రికి తరలించారు. వారిద్దరితో పాటు నలుగురు చెట్టు మొదలులోని నాలుగు గంటల పాటు ఉండిపోయారు. ఐదుగురికి స్వల్ప గాయాలయ్యాయి. ప్రయాణికులంతా బ్రాడ్ మీడాస్ నుంచి బయలుదేరినట్లు హెరాల్డ్ సన్ పత్రిక రాసింది. డ్రైవర్ కు 26 ఏళ్లుంటాయి. ప్రయాణికులంతా 22 నుంచి 28 ఏళ్ల మధ్య వయస్సువారు. ప్రయాణికుల్లో ముగ్గురు ఆస్ట్రేలియా వాసులు కాగా, ఏడుగురు భారత విద్యార్థుల విసాలపై ఉన్నారు.