కమలం వికసిస్తుంది: భగవత్

న్యూఢిల్లీ: బిజెపి నుంచి మళ్లీ లేస్తుందని రాష్ట్రీయ స్వయం సేవక్ సంఘ్ (ఆర్ ఎస్ ఎస్) చీఫ్ మోహన్ భగవత్ వ్యాఖ్యానించారు. ప్రాణాలర్పించే లక్షలాది మంది కార్యకర్తలున్న పార్టీ సంక్షోభం నుంచి బయట పడుతుందని ఆయన శుక్రవారం సాయంత్రం మీడియా ప్రతినిధుల సమావేశంలో అన్నారు. ముస్లింలు, ఇతర మతాల వారు కూడా దేశంలో భాగమేనని ఆయన అన్నారు. బిజెపి అంతర్గత వ్యవరాల్లో తాము జోక్యం చేసుకోబోమని, బిజెపి నాయకత్వ సమస్యను తనంత తానే పరిష్కరించుకుంటుందని ఆయన అన్నారు. అడిగితే సలహాలు ఇస్తాం తప్ప తాము బిజెపి వ్యవహారాల్లో జోక్యం చేసుకోబోమని ఆయన అన్నారు.

అందరూ కలిసికట్టుగా ముందుకు వెళ్లాలని మాత్రమే తాను బిజెపి అధ్యక్షుడు రాజ్ నాథ్ సింగ్ కు సూచించినట్లు ఆయన తెలిపారు. పార్టీని సంఘ్ తన చేతుల్లోకి తీసుకోవాలని సీనియర్ బిజెపి నేత అరుణ్ శౌరీ వ్యాఖ్యలపై మాట్లాడడానికి ఆయన నిరాకరించారు. జస్వంత్ సింగ్ పుస్తకం తాను చదవలేదని ఆయన ఒక ప్రశ్నకు సమాధానంగా చెప్పారు. ఆర్ఎస్ఎస్ మాజీ చీఫ్ సుదర్సన్ జిన్నాను ప్రశంసించలేదని ఆయన అన్నారు. కాందహార్ వ్యవహారంపై మాట్లాడడానికి కూడా ఆయన నిరాకరించారు.