అద్వానీ పని ముగిసినట్లే: పరికర్

పానాజీ: తమ పార్టీ ప్రముఖ నేత ఎల్ కె అద్వానీ రాజకీయ జీవితం దాదాపుగా ముగిసినట్లేనని భారతీయ జనతా పార్టీ (బిజెపి) సీనియర్ నేత మనోహర్ పరికర్ వ్యాఖ్యానించారు. మరో ఒకటి రెండేళ్లు మాత్రమే అద్వానీ క్రియాశీలక రాజకీయాల్లో ఉంటారని ఆయన స్థానిక టీవీ చానెల్ తో అన్నారు. అద్వానీ బూజెక్కిన పచ్చడిగా మారిపోయారని ఆయన వ్యాఖ్యానించారు. ఒక ఏడాది పాటు ఊరబెడితే పచ్చడి రుచిగా ఉంటుందని, అంతకన్నా ఎక్కువ రోజులుంటే బూజు పడుతుందని ఆయన అన్నారు. అయితే అద్వానీ తమ మధ్యనే ఉండి తమకు మార్గం చూపుతూ ఉంటారని ఆయన అన్నారు.

సమగ్రతకు, వ్యక్తిత్వానికి సంబంధించి బిజెపిలో అద్వానీ ఉత్తమ నాయకుడని ఆయన అన్నారు. ఈ విషయంలో అద్వానీపై తనకు ఎనలేని అభిమానం ఉందని ఆయన అన్నారు. విశ్వసనీయత గల యువ నేత పార్టీకి నాయకత్వం వహించాల్సిన సమయం వచ్చిందని ఆయన అభిప్రాయపడ్డారు. రాజ్ నాథ్ సింగ్ స్థానంలో పరికర్ బిజెపి అధ్యక్ష పగ్గాలు చేపట్టే అవకాశం ఉందని ప్రచారం జరుగుతోంది.