రాహుల్ కళావతి నామినేషన్

నాగపూర్: మాహారాష్ట్ర శాసనసభ ఎన్నికల్లో వాని నియోజక వర్గం నుంచి స్వతంత్ర అభ్యర్థిగా రాహుల్ గాంధీ కళావతి నామినేషన్ దాఖలు చేశారు. అనారోగ్యంతో ఆస్పత్రి పాలైన కళావతి నామినేషన్ చేస్తారా, లేదా అనే సందేహానికి దీంతో తెర పడింది. విదర్భ ప్రాంతం రైతు అయిన కళావతి భర్త అప్పుల బారిన పడి ఆత్మహత్య చేసుకున్నాడు. ఈ విషయాన్ని రాహుల్ గాంధీ పార్లమెంటులో ప్రస్తావించారు. గురువారంనాడు ఛాతీ నొప్పితో బాధపడుతూ ఆస్పత్రిలో చికిత్స పొందుతున్న కళావతిని విదర్భ జనాందోళన్ సమితి అధ్యక్షుడు కిశోరీ తివారీ అంబులెన్స్ లో వానిలోని అసిస్టెంట్ రిటర్నింగ్ అధికారి కార్యాలయానికి తీసుకొచ్చారు. ఆమె అక్కడ నామినేషన్ పత్రాలు దాఖలు చేశారు.

పోటీ చేయాలని తనపై ఒత్తిడి పెడుతున్నారని, రాజకీయాలంటే తనకేమీ తెలియదని అంతకు ముందు ఆ 48 ఏళ్ల మహిళ అన్నారు. తాను పోటీ చేయబోనని కూడా చెప్పారు. సులభ్ సాయం పోతుందనే భయంతోనే తాను పోటీ చేయబోనని కళావతి అంటోందని విజెఎస్ తివారీ అన్నారు. ఆమెను విజెస్ ఎన్నికల్లో పోటీకి దింపుతోంది. రాహుల్ గాంధీ ఆమె విషయాన్ని పార్లమెంటులో ప్రస్తావించిన తర్వాత సులభ్ ఇంటర్నేషనల్ ఆమె పేరున 30 లక్షల రూపాయలను బ్యాంకులో వేసింది. కళావతికి ఆర్పీఐ నాయకత్వంలోని వామపక్ష ప్రజాతంత్ర కూటమి మద్దతు ఇస్తోంది.