చిన్న పార్టీలకు ఓటేయవద్దు: బాబు

హైదరాబాద్: గ్రేటర్ హైదరాబాద్ ఎన్నికల్లో చిన్న పార్టీలకు ఓటు వేయవద్దని తెలుగుదేశం పార్టీ అధ్యక్షుడు నారా చంద్రబాబునాయుడు ప్రజలకు పిలుపునిచ్చారు. చిరంజీవి నేతృత్వంలోని ప్రజారాజ్యం, జయప్రకాష్ నారాయణ నాయకత్వంలోని లోకసత్తా పార్టీలను దృష్టిలో పెట్టుకుని ఆయన గురువారం ఆ పిలుపునిచ్చారు. చిన్న పార్టీలకు ఓటేయడం వల్ల కాంగ్రెసుకు ప్రయోజనం చేకూరుస్తుందని, అందువల్ల వాటికి ఓటు వేయవద్దని ఆయన అన్నారు. కాంగ్రెసు పార్టీని చిత్తుగా ఓడించాలని ఆయన ప్రజలను కోరారు.

అవినీతి కాంగ్రెసును ఓడించే సత్తా కేవలం తెలుగుదేశం పార్టీకే ఉందని ఆయన అన్నారు. పటాన్ చెరు ప్రాంతానికి చెందిన వందలాది మంది తెలంగాణ రాష్ట్ర సమితి (తెరాస) కార్యకర్తలు తమ పార్టీ వైపు మొగ్గు చూపుతున్నారని ఆయన చెప్పారు. కాంగ్రెసు ప్రభుత్వం అవినీతిలో కూరుకుపోయిందని ఆయన విమర్శించారు. జార్ఖండ్ మాజీ ముఖ్యమంత్రి మధు కొడాపై చర్యలు చేపట్టిన కేంద్ర ప్రభుత్వం ఓబుళాపురం గనుల వ్యవహారంపై ఎందుకు జాప్యం చేస్తోందని ఆయన ప్రశ్నించారు.