గ్రేటర్ ఎన్నికల బాధ్యత నాదే: దానం

హైదరాబాద్: గ్రేటర్ హైదరాబాద్ ఎన్నికల్లో జయాపజయాలకు తనదే బాధ్యత అని కాంగ్రెసు గ్రేటర్ హైదరాబాద్ అధ్యక్షుడు, రాష్ట్ర ఆరోగ్య శాఖ మంత్రి దానం నాగేందర్ అన్నారు. పార్టీ ఎన్నికల ప్రణాళికను గురువారం సాయంత్రం విడుదల చేస్తామని ఆయన చెప్పారు. గ్రేటర్ హైదరాబాద్ ఎన్నికల్లో కాంగ్రెసు విజయం ఖాయమని ఆయన ధీమా వ్యక్తం చేశారు. నియోజకవర్గాలవారీగా మంత్రులకు ఎన్నికల బాధ్యతను అప్పగించినట్లు ఆయన తెలిపారు.

గ్రేటర్ హైదరాబాద్ ఎన్నికల్లో వంద సీట్లు గెలవాలనేది దివంగత నేత వైయస్ రాజశేఖర రెడ్డి లక్ష్యమని, ఆ లక్ష్య సాధనకు తాము పాటు పడుతున్నామని, తాము 80 నుంచి 100 స్థానాలు గెలుచుకుంటామని ఆయన అన్నారు. తాము గ్రేటర్ హైదరాబాద్ ఎన్నికలను ప్రతిష్టాత్మకంగా తీసుకుంటున్నట్లు ఆయన తెలిపారు. పని ఒత్తిళ్ల వల్ల తమ పార్టీ ఆంధ్రప్రదేశ్ వ్యవహారాల ఇంచార్జీ హైదరాబాద్ రాలేకపోతున్నారని ఆయన చెప్పారు.