కెసిఆర్ కు తలసాని క్షమాపణలు

హైదరాబాద్: తెలంగాణ రాష్ట్ర సమితి అధ్యక్షుడు కె. చంద్రశేఖర రావుకు తెలుగుదేశం నాయకుడు తలసాని శ్రీనివాస యాదవ్ క్షమాపణలు చెప్పారు. తన వ్యాఖ్యలు బాధించి ఉంటే కెసిఆర్ కు తాను క్షమాపణలు చెబుతున్నానని ఆయన గురువారంనాడు అన్నారు. తాను ఆవేశంలో ఆ మాటలన్నాను తప్ప కెసిఆర్ ను బాధించాలని కాదని ఆయన వివరణ ఇచ్చారు. సెటిలర్లను తాము న్యాయపరంగా, చట్టపరంగా ఎల్లవేళలా ఆదుకుంటామని ఆయన హామీ ఇచ్చారు.

తాను తలుచుకుంటే హైదరాబాదులో కెసిఆర్ చేత ఇల్లు ఖాళీ చేయిస్తానని శ్రీనివాస యాదవ్ ఇటీవల తెలుగుదేశం పార్టీ కార్యకర్తల విస్తృత స్థాయి సమావేశంలో అన్నారు. దీనిపై అన్నివైపుల నుంచి విమర్శలు వెల్లువెత్తాయి. దాంతో ఆయన వెనకకు తగ్గినట్లు కనిపిస్తోంది.