నన్ను రాజకీయాల్లోకి లాగొద్దు: విజయశాంతి

మెదక్: తెలంగాణ రాములమ్మ, తెలంగాణ రాష్ట్ర సమితి అసమ్మతి లోకసభ సభ్యురాలు విజయశాంతి కొత్త రాగం అందుకున్నారు. తనను రాజకీయాల్లోకి లాగవద్దని ఆమె అంటున్నారు. తన నియోజకవర్గం ప్రజలకు సేవ చేయడమే తన ముందున్న ప్రధాన లక్ష్యమని ఆమె అన్నారు. మెదక్ జిల్లా జిన్నారం మండలం మాదారంలో ఆమె గురువారం రెండు గంటల పాటు ఆకస్మిక తనిఖీలు నిర్వహించారు. ఈ సందర్భంగా ఆమెను మీడియా ప్రతినిధులు ప్రశ్నించినప్పుడు తనను రాజకీయాల్లోకి లాగవద్దని అన్నారు.

స్థానికుల నుంచి ఆమె సమస్యలను అడిగి తెలుసుకున్నారు. ఎంపి నిధులతో అయ్యే పనులకు తక్షణమే ఆమె హామీ ఇచ్చారు. మంజీరా నీళ్ల వంటి డిమాండ్లు ప్రభుత్వంతో అయ్యే పనులని ఆమె అన్నారు. అందుకు ప్రతిపాదనలు రూపొందించి ఆ డిమాండ్ పరిష్కారానికి కృషి చేస్తానని ఆమె చెప్పారు.