హెడ్లీతో నాకేం సంబంధం లేదు: కంగనా

ముంబై: ఉగ్రవాద సంస్థ లష్కరే తోయిబా మనిషి డేవిడ్ కొలెమన్ హెడ్లీతో తనకు ఏ విధమైన సంబంధం లేదని బాలీవుడ్ నటి కంగనా రనౌత్ స్పష్టం చేశారు. హెడ్లీతో తనకు సంబంధం ఉందని ప్రచారం చేస్తున్నవారిపై చట్టపరమైన చర్యలు తీసుకుంటానని ఆమె హెచ్చరించారు. మీడియా హెడ్లీతో తనకు సంబంధాలను అంటగడుతూ వార్తా కథనాలు రాయడంపై ఆమె మండిపడ్డారు. హెడ్లీతో తాను ఏ రోజు కూడా మాట్లాడలేదని ఆమె చెప్పింది.

ప్రముఖ బాలీవుడ్ దర్శకుడు మహేష్ భట్ కుమారుడ్ రాహుల్ భట్ తో తనకు పరిచయం కూడా లేదని ఆమె చెప్పారు. తనపై వస్తున్న వార్తలన్నీనిరాధారమని ఆమె ఒక ఇంగ్లీష్ టీవీ చానెల్ తో అన్నారు. ఏ విధమైన ఆధారాలు లేకుండా తనపై బురద చల్లుతున్నారని ఆమె అన్నారు. డేవిడ్ హెడ్లీతో గానీ రాహుల్ భట్ తో గానీ తనకు సంబంధాలు ఉన్నట్లు ఏ దర్యాప్తు సంస్థ కూడా చెప్పలేదని ఆమె అన్నారు. తనపై వస్తున్న వార్తాకథనాలన్నీ ఊహాగానాలేనని ఆమె కొట్టిపారేశారు. బాధ్యత గల పౌరురాలిగా తాను నిజమే చెబుతున్నానని ఆమె అన్నారు.