రాజకీయ కోల్డ్ స్టోరేజీలో చంద్రబాబు: బొత్స సత్యనారాయణ

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు ప్రస్తుతం రాజకీయంగా కోల్డ్ స్టోరేజీలో ఉన్నారని రాష్ట్ర పంచాయతీ రాజ్ శాఖ మంత్రి బొత్స సత్యనారాయణ వ్యాఖ్యానించారు. తెలంగాణపై చంద్రబాబు ఇప్పటికీ తన వైఖరిని వెల్లడించకపోవడాన్ని ఆయన తప్పు పట్టారు. మెడలు వంచైనా తెలంగాణ సాధిస్తామని ప్రకటించిన తెలుగుదేశం పార్టీ నాయకులు కేంద్ర ప్రకటన వెలువడిన తర్వాత యు - టర్న్ తీసుకున్నారని ఆయన సోమవారం మీడియా ప్రతినిధులతో అన్నారు. కొన్ని పార్టీలు రాజకీయ ప్రయోజనాల కోసమే సంక్షోభాన్ని సృష్టిస్తున్నాయని ఆయన దూషించారు.

తన ఉనికిని కాపాడుకోవడానికి చంద్రబాబు జెఎసిలు ఏర్పాటు చేసి ఇబ్బందులు పెట్టాలనే ప్రయత్నం చేస్తున్నారని ఆయన విమర్శించారు. కాంగ్రెసు పార్టీ నాయకులు చంద్రబాబు ఉచ్చులో పడకూడదని ఆయన సూచించారు. ఆలాంటి పార్టీతో జత కడితే కాంగ్రెసు విధానాలకు నష్టం కలుగుతుందని ఆయన అన్నారు. కేంద్ర ప్రభుత్వ నిర్ణయానికి అందరం కట్టుబడి ఉండాలని ఆయన అన్నారు. తెలంగాణ జెఎసి నుంచి కాంగ్రెసు బయటకు రావడం మంచిదని ఆయన అన్నారు. జెఎసిల నుంచి బయటకు రావాలనే వీరప్ప మొయిలీ ప్రకటన సీమాంధ్ర నేతలకు కూడా వర్తిస్తుందని తెలంగాణ కాంగ్రెసు నాయకులు అంటుండడాన్ని మీడియా ప్రతినిధులు ప్రస్తావించగా ఆ వాదన సరైందేనని ఆయన అన్నారు. వ్యక్తిగత ప్రయోజనాల కోసం తెలుగుదేశం నాయకులు తెలంగాణను వాడుకుంటున్నారని ఆయన విమర్శించారు.