చంద్రబాబు నాయుడుకు రెండు నాల్కలు: కె చంద్రశేఖర రావు

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు తనకు సీమాంధ్ర, తెలంగాణ రెండు కళ్లంటున్నారని, నిజానికి చంద్రబాబుకు రెండు కళ్లు లేవని, రెండు నాల్కలున్నాయని తెలంగాణ రాష్ట్ర సమితి (తెరాస) అధ్యక్షుడు నారా చంద్రబాబు నాయుడు వ్యాఖ్యానించారు. ప్రపంచంలో ఏ రాజకీయ పార్టీకైనా ఒకే విధానం ఉంటుందని, కానీ టిడిపి రెండు విధానాలుంటాయట అని ఆయన అన్నారు. కరీంనగర్ జిల్లా ధర్మపురికి చెందిన జడ్పీటిసి, ఎంపిటిసీలు, సర్పంచులు తెలుగుదేశం పార్టీ నుంచి తెరాసలో చేరిన సందర్భంగా ఆయన సోమవారం మాట్లాడారు.

పదవుల కోసమో, కాంట్రాక్టుల కోసమో ఉద్యమం ప్రారంభించలేదని ఆయన అన్నారు. పదేళ్లుగా ప్రత్యేక రాష్ట్రం కోసమే తాము పని చేస్తున్నామని ఆయన అన్నారు. ప్రత్యేక రాష్ట్ర సాధన కోసం పదవులను తృణప్రాయంగా వదిలేసిన చరిత్ర తమ పార్టీకి ఉందని ఆయన అన్నారు. రాజకీయ అధికారం మన వద్దనే ఉండాలని, కత్తి వాళ్ల వద్ద ఉంటే యుద్ధం ఎలా చేస్తామని ఆయన అన్నారు. తాను 2001లో తాను ఉద్యమం చేపట్టి గ్రామగ్రామాన తిరుతుండడంతో చంద్రబాబు అప్పుడు అధికారంలో ఉండి దేవాదుల ప్రాజెక్టుకు హడావిడిగా శంకుస్థాపన చేశారని, దానికి ఇప్పటికీ గతి లేదని ఆయన అన్నారు.