కెసిఆర్ తో లగడపాటి రాజగోపాల్ కుమ్మక్కయ్యారా?

నల్లగొండ: తెలంగాణలో జరిగిన ఉప ఎన్నికల్లో తెలంగాణ రాష్ట్ర సమితి (తెరాస) అభ్యర్థులు గెలిచారని సర్వేలో తేలినట్లు ప్రకటించిన కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ పై ఐటి శాఖ మంత్రి కోమటిరెడ్డి వెంకటరెడ్డి నిప్పులు చెరిగారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో లగడపాటి కుమ్మక్కయ్యారని ఆయన ఆరోపించారు. వక్ఫ్ బోర్డు ఆస్తుల కోసం లగడపాటి కెసిఆర్ తో చేతులు కలిపారని, అందుకే తెరాస గెలుస్తుందని సర్వేలో తేలినట్లు లగడపాటి ప్రకటించారని ఆయన గురువారం మీడియా ప్రతినిధులతో అన్నారు.

లగడపాటి రాజగోపాల్ సర్వే బోగస్ అని ఆయన అన్నారు. లగడపాటి రాజగోపాల్ తప్పుడు సర్వేపై తాను తమ కాంగ్రెసు పార్టీ అధ్యక్షురాలు సోనియా గాంధీకి ఫిర్యాదు చేస్తామని ఆయన చెప్పారు. లగడపాటి రాజగోపాల్ ను పార్టీ నుంచి సస్పెండ్ చేయాలని ఆయన డిమాండ్ చేశారు. గతంలో భువనగిరి లోకసభ స్థానం నుంచి తన సోదరుడు కోమటిరెడ్డి రాజగోపాల్ రెడ్డి ఓడిపోతారని లగడపాటి చెప్పారని, కానీ తన సోదరుడు విజయం సాధించాడని ఆయన అన్నారు.