తెలంగాణ రాష్టం ఏర్పడి తీరుతుంది: రామ్ జెఠ్మలానీ

హైదరాబాద్: తెలంగాణ రాష్ట్ర ఏర్పాటు డిమాండ్ కు ప్రముఖ న్యాయవాది, రాజ్యసభ సభ్యుడు రామ్ జెఠ్మలానీ తన మద్దతు ప్రకటించారు. ఆయన శనివారం హైదరాబాదులో ఏర్పాటైన తెలంగాణ న్యాయవాదుల సదస్సుకు హాజరయ్యారు. ఈ సదస్సులో ఆయన తెలంగాణపై తన మనసులోని మాటను వినిపించారు. తెలంగాణ రాష్ట్రం ఏర్పడి తీరుతుందని ఆయన ధీమా వ్యక్తం చేశారు. ప్రతి ఒక్కరు రాష్ట్రం విడిపోవాలని కోరుకుంటున్న తరుణంలో తెలంగాణ ఏర్పడడం ఖాయమని ఆయన అన్నారు.

రాష్ట్ర విభజన అనేది విద్వేషాలతో జరగకూడదని ఆయన అన్నారు. సోదరుల మాదిరిగా, కలిసి మెలసి ఉండడానికి వీలుగా రాష్ట్ర విభజన జరగాలని ఆయన అన్నారు. సదస్సులో ఆయన జై తెలంగాణ నినాదం చేశారు. న్యాయవాదులు పాల్గొన్న ప్రతి ఉద్యమం కూడా విజయం సాధించిందని ఆయన అన్నారు.