బిపిఒ ఉద్యోగిని రేప్, హత్య కేసు: క్యాబ్ డ్రైవర్ కు జీవిత ఖైదు

బెంగుళూరు: కాల్‌సెంటర్‌ ఉద్యోగిని ప్రతిభామూర్తి రేప్, హత్య కేసులో నిందితుడు శివకుమార్‌కు బెంగుళూరు ఫాస్ట్‌ ట్రాక్‌ కోర్టు జీవితఖైదు విధించింది. 2005లో ఈ సంఘటన జరిగింది. 28 ఏళ్ల ప్రతిభామూర్తి ఓ కాల్ ‌సెంటర్‌ లో పనిచేసేవారు. నైట్ ‌డ్యూటీ అనంతరం ప్రతిభను ఇంటి వద్ద దించేందుకు వెళ్లిన క్యాబ్‌ డ్రైవర్‌ శివకుమార్‌ ఆమెపై అత్యాచారం చేసి హత్య చేశాడు. ఈ సంఘటన రాష్ట్రవ్యాప్తంగా తీవ్ర సంచలనం సృష్టించింది. అప్పటినుంచి బీపీఓ సంస్థలన్నీ రాత్రివేళ ఉద్యోగులను పంపేటప్పుడు కంపెనీ గార్డును కూడా పంపుతున్నాయి. నిందితుడిపై చర్య తీసుకోవాలంటూ 80 ఏళ్ల ప్రతిభ తల్లి కోర్టుల్లో పోరాడారు. ఎట్టకేలకు శివకుమార్‌ ను కోర్టు దోషిగా గుర్తించి జీవితఖైదు విధించారు.

తొలుత నేరాన్ని అంగీకరించిన శివకుమార్ ఆ తర్వాత మాట మార్చాడు. తనపై మోపిన అభియోగాల్లో నిజం లేదని అతను వాదించాడు. ఈ కేసు విచారణ తొలుత బెంగళూర్ సెషన్స్ కోర్టులో జరిగింది. 2009 డిసెంబర్ లో ఆ కేసును ఫాస్ట్ ట్రాక్ కోర్టుకు మార్చారు. ఈ కేసులో మొత్తం 71 మంది సాక్షులను విచారించారు.