వైయస్ జగన్ ముందు వివియస్ లక్ష్మణ్ దిగదుడుపే

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్ ముందు హైదరాబాద్ బ్యాట్స్ మన్ వివియస్ లక్ష్మణ్ కూడా పనికి రాలేదు. జగన్ తలుచుకుంటే లక్ష్మణ్ ఓ లెక్కా అనేందుకు తగిన నిదర్శనం దొరికింది. హైదరాబాదులోని ఉప్పల్ స్టేడియంలో ఓ స్టాండుకు వందకు పైగా టెస్టులు ఆడిన లక్ష్మణ్ పేరు పెడదామని పెద్దలు అనుకున్నారు. కానీ అకస్మాత్తుగా జగన్ కు చెందిన భారతి సిమెంట్స్ వాలడంతో లక్ష్మణ్ పేరు మాయమైంది. దీనిపై ఈనాడు దినపత్రిక ఓ సమగ్ర వార్తాకథనాన్ని బుధవారం సంచికలో ప్రచురించింది. ఓ స్టాండుకు లక్ష్మణ్ పేరు పెట్టాలని నాలుగు రోజుల క్రితం హైదరాబాద్‌ క్రికెట్‌ సంఘం (హెచ్‌సీఏ)లో సాగింది. శనివారం పరిస్థితి పూర్తిగా మారిపోయింది. కడప ఎంపీ వైఎస్‌ జగన్మోహన్‌రెడ్డికి చెందిన భారతీ సిమెంట్స్‌ స్టాండు కొనేందుకు ముందుకురావడంతో 'లక్ష్మణ్‌ స్టాండు' ప్రతిపాదన అటకెక్కిందని, హెచ్‌సీఏలోని కొంతమంది పెద్దలు కమీషన్ల కోసమే భారతీ సిమెంట్స్‌ను తెరపైకి తెచ్చారన్న ఆరోపణలు వినిపిస్తున్నాయని ఈనాడు దినపత్రిక వ్యాఖ్యానించింది.

ఉప్పల్‌ స్టేడియంలో ఈ నెల 12వ తేదీ నుంచి తొలిటెస్టు జరుగనున్న నేపథ్యంలో స్టేడియంలో ఒక స్టాండుకు లక్ష్మణ్‌ పేరుపెట్టాలని దాదాపుగా నిర్ణయించారు. స్టేడియం నిర్మాణంలో కీలకపాత్ర పోషించిన శివలాల్‌ యాదవ్‌ సేవలకు గుర్తింపుగా పెవిలియన్‌ ఎండ్‌కు ఆయన పేరు పెట్టారు. రూ.4.5 కోట్లు ఇచ్చిన విశాఖ ఇండస్ట్రీస్‌ పేరు మరో ఎండ్‌కు పెట్టారు. గతంలో డబ్బుకు కొరత రావడంతో ఈస్టర్న్‌ స్టాండు హక్కుల్ని రూ.3.5 కోట్లకు జీఎంఆర్‌కు ఇచ్చారు. మిగిలింది వెస్టర్న్‌ స్టాండే. దానికి లక్ష్మణ్‌ పేరు పెట్టాలనుకున్నారు. ప్రకటనే తరువాయి అనుకున్న సమయంలో రంజీమ్యాచ్‌లో హైదరాబాద్‌ జట్టు 21 పరుగులకే ఆలౌటవడంతో 'లక్ష్మణ్‌ స్టాండు' ప్రకటన మూలన పడింది. కోచ్‌ల రాజీనామాలపై నిర్ణయం తీసుకునేందుకు శనివారం అత్యవసరంగా హెచ్‌సీఏ కార్యనిర్వాహక కమిటీ భేటీ అయింది. కోచ్‌ల రాజీనామాలు ఆమోదించి, కొత్త శిక్షకులను నియమించాక సమావేశంలో వెస్ట్రన్‌ స్టాండ్‌ స్పాన్సర్‌షిప్‌ను భారతీకి కేటాయించే అంశాన్ని తెరపైకి తెచ్చారు. భారతీ సిమెంట్స్ తెరపైకి రావడంపై అనేక అనుమానాలు వ్యక్తమవుతున్నాయి.