చర్లపల్లి జైలులో గ్యాంగ్ వార్: 8 మందికి గాయాలు

హైదరాబాద్: హైదరాబాదులోని చర్లపల్లి జైలులో బుధవారం ఉదయం గ్యాంగ్ వార్ చోటు చేసుకుంది. ఖైదీలు రెండుగా విడిపోయి కొట్టుకున్నట్లు వార్తలు వస్తున్నాయి. అయూబ్ ఖాన్ అనే ఖైదీ ఇతర ఖైదీలపై దాడి చేశాడని అంటున్నారు. ఈ దాడిలో ఏడుగురు ఖైదీలు గాయపడ్డారు. ఘర్షణను ఆపడానికి ప్రయత్నించిన జైలర్ కృష్ణమూర్తి కూడా గాయపడ్డారు. గాయపడినవారిని చికిత్స నిమిత్తం ఆస్పత్రికి తరలించారు. దాదాపు 20 మంది ఖైదీలు రెండుగా విడిపోయి పరస్పరం దాడులకు దిగినట్లు చెబుతున్నారు. గాయపడినవారులో ఐదుగురు వరంగల్ జిల్లాకు చెందినవారని, వారు జీవిత ఖైదు అనుభవిస్తున్నారని చెబుతున్నారు.

కాగా, ఓ ఖైదీ మరో ఖైదీపై ఉమ్మేయడంతో బరాక్ లో ఘర్షణ జరిగిందని జైలు అధికారులు చెబుతున్నారు. అయితే, అది అసలు కారణం కాదని, చర్లపల్లి జైలులో తరుచుగా ఘర్షణలు జరుగుతున్నాయని వార్తలు వస్తున్నాయి. అభిప్రాయ భేదాలున్న ఖైదీలను ఒకే బరాక్ లో ఉంచడం వల్ల తరుచుగా ఇటువంటి ఘర్షణలు జరుగుతున్నాయని అంటున్నారు. తనను కొట్టాడంటూ రాములు అనే ఖైదీ అయూబ్ ఖాన్ పై ఫిర్యాదు చేశాడు. దీంతో వివాదం ముదిరినట్లు తెలుస్తోంది.