సిఎం కిరణ్ కుమార్ రెడ్డి చూసుకుంటారు: వీరప్ప మొయిలీ

న్యూఢిల్లీ: మంత్రివర్గ కూర్పులో ఏర్పడిన సంక్షోభం సర్దుకుంటుందని రాష్ట్ర వ్యవహారాల ఇంఛార్జ్ వీరప్ప మొయిలీ గురువారం ఢిల్లీలో అన్నారు. ఢిల్లీ పెద్దలు హైదరాబాద్ వెళ్లాల్సిన అవసరం లేదన్నారు. మంత్రివర్గ కూర్పు జరిగినప్పుడు అసంతృప్తి మామూలేనన్నారు. దానిని ముఖ్యమంత్రి కిరణ్ కుమార్ రెడ్డి చూసుకుంటారన్నారు. ఆయన పరిష్కరిస్తారని ఆశాభావం వ్యక్తం చేశారు. కాగా విలేకరులు ఉపముఖ్యమంత్రి పదవి గురించి ఆడగటంతో మొయిలీ దానిపై మాట్లాడటానికి నిరాకరించారు.

పార్టీలోని పార్లమెంటు సభ్యుల అందరి మద్దతు ముఖ్యమంత్రి కిరణ్ కుమార్ రెడ్డికే ఉన్నదని పార్లమెంటు సభ్యుడు రాయపాటి సాంబశివరావు తెలిపారు. మా అందరి మద్దతు ఆయనకే అని ప్రకటించారు. మంత్రులు అసంతృప్తి చెందడం సబబు కాదు అని రాయపాటి వ్యాఖ్యానించారు. రాయపాటి ఏఐసిసి అధ్యక్షురాలు సోనియాగాంధీ వ్యక్తిగత కార్యదర్శి అహ్మద్ పటేల్ తో భేటీ అయ్యారు.