బలహీనుడననే నాకు మంత్రి పదవి ఇవ్వలేదు: జెసి దివాకర్ రెడ్డి

హైదరాబాద్: తాను బలహీనుడని ముఖ్యమంత్రి కిరణ్ కుమార్ రెడ్డి అనుకున్నందునే మంత్రి పదవి ఇవ్వలేదని, మిగిలిన వారు బలవంతులు అనుకున్నారు కాబట్టి మంత్రి పదవి ఇచ్చారని అనంతపురం జిల్లాకు చెందిన శాసనసభ్యుడు జెసి దివాకర్ రెడ్డి అన్నారు. శాఖల్లో కేటాయింపుల్లో అసంతృప్తికి గురైన మంత్రులకు ఆయన సర్ది చెప్పుకుంటారన్నారు. పార్టీకి, ప్రభుత్వానికి ఎలాంటి ఢోకా లేదన్నారు. మంత్రివర్గంలో చోటు లభించకపోవటంపై నాకేమీ అసంతృప్తి లేదన్నారు.

కాగా ధర్మాన ఇంటిలో భేటీ అయిన అసంతృప్త మంత్రులు తమకు కేటాయించిన శాఖలపై ఎలాంటి అసంతృప్తి లేదని తేల్చి చెప్పారు. దానం నాగేందర్, పొన్నాల లక్ష్మయ్య, కాసు వెంకటకృష్ణారెడ్డి తదితరులు తాము అసంతృప్తితో ఉన్నామనే వ్యాఖ్యలు నిరాధారమన్నారు. మా శాఖలపై మాకు ఎలాంటి అసంతృప్తి లేదన్నారు. అయితే మంత్రివర్గం సమావేశంలో ముఖ్యమంత్రితోనే మాట్లాడి తేల్చుకుందాని వారు అనుకుంటున్నట్టు సమాచారం. మంత్రివర్గంలో అసంతృప్తులంటూ మీడియానే అనవసర రాద్దాంతం చేస్తుందని మంత్రి శ్రీధర్ బాబు అన్నారు. మాకయితే అలాంటి వాతావరణమేది కనిపించటం లేదన్నారు.