కిరణ్ ప్రభుత్వం కూలిపోతుంది, కొత్త సిఎం వస్తారు: పెద్దిరెడ్డి రామచంద్రా రెడ్డి

తిరుపతి‌: ముఖ్యమంత్రి కిరణ్ కుమార్ రెడ్డి ప్రభుత్వం కూలిపోతుందని మాజీ మంత్రి పెద్దిరెడ్డి రామచంద్రారెడ్డి అన్నారు. మరో మాజీ మంత్రి శిల్పా మోహన్ రెడ్డితో భేటీ తర్వాత ఆయన గురువారం మీడియా ప్రతినిధులతో మాట్లాడారు. మంత్రి పదవులు దక్కకపోవడంతో వీరిద్దరు కిరణ్ కుమార్ రెడ్డిపై అసంతృప్తితో ఉన్నారు. మంత్రి పదవి ఆశించి భంగపడిన మరో మాజీ మంత్రి జెసి దివాకర్ రెడ్డి పెద్దిరెడ్డి రామచంద్రారెడ్డితో ఫోన్ లో మాట్లాడారు. ముఖ్యమంత్రి కిరణ్ కుమార్ రెడ్డిపై పెద్దిరెడ్డి రామచంద్రారెడ్డి తీవ్రంగా ధ్వజమెత్తారు. వచ్చే ఏడాది 31వ తేదీ తర్వాత ముఖ్యమంత్రి మారుతారని ఆయన చెప్పారు. ప్రభుత్వం కూలిపోతుంది గానీ మధ్యంతర ఎన్నికలు రావని ఆయన అన్నారు.

ముఖ్యమంత్రి కిరణ్ కుమార్ రెడ్డికి వ్యతిరేకంగా పనిచేయడమే తన ఏకైక ఎజెండా అని ఆయన చెప్పారు. చిత్తూరు జిల్లాకు కిరణ్ కుమార్ రెడ్డి ఒరగబెట్టిందేమీ లేదని ఆయన విమర్శించారు. జిల్లాలో కిరణ్ కుమార్ రెడ్డికి వ్యతిరేకంగా పనిచేసే అన్ని శక్తులకూ మద్దతిస్తామని ఆయన చెప్పారు. మంత్రులకు శాఖల కేటాయింపుల్లో ముఖ్యమంత్రి సరిగా వ్యవహరించలేదని ఆయన అన్నారు. కిరణ్ కుమార్ రెడ్డి ప్రభుత్వంపై ఎదురుదాడి మాత్రమే ఉంటుందని ఆయన చెప్పారు.