వైయస్ జగన్ ఫ్యాక్టర్: వెనక్కి తగ్గుతున్న తెలంగాణ మంత్రులు

హైదరాబాద్‌: తెలంగాణ మంత్రులపై వైయస్ జగన్ ఫ్యాక్టర్ పనిచేస్తోంది. తాము అసంతృప్తి వ్యక్తం చేస్తూ ముఖ్యమంత్రి కిరణ్ కుమార్ రెడ్డికి వ్యతిరేకంగా రాజకీయాలు నడిపితే వైయస్ జగన్ తెలంగాణలో బలపడే ప్రమాదం ఉందని వారు భావిస్తున్నారు. తమకు సరైన శాఖలు కేటాయించలేదని అసంతృప్తికి గురై రాజీనామాలు చేయాలని భావించిన తెలంగాణకు చెందిన మంత్రులు మనసు మార్చుకుంటున్నారు. రాజీనామాలపై వెనక్కి తగ్గేందుకు సిద్ధపడుతున్నారు. కోమటిరెడ్డి వెంకటరెడ్డి, రాంరెడ్డి వెంకటరెడ్డి, పొన్నాల లక్ష్మయ్య, దానం నాగేందర్, పి. శంకరరావు వంటి మంత్రులు తమకు కేటాయించిన శాఖలపై తీవ్ర అసంతృప్తి వ్యక్తం చేశారు.

కోమటిరెడ్డి వెంకటరెడ్డి, రాంరెడ్డి వెంకటరెడ్డి రాజీనామాలు చేయడానికి కూడా సిద్ధపడ్డారు. అయితే, తెలంగాణలో వైయస్ జగన్ బలపడేందుకు తమ అసంతృప్తి కార్యకలాపాలు ఉపయోగపడతాయని భావించి వారు వెనక్కి తగ్గినట్లు కనిపిస్తోంది. పైగా, తెలంగాణ విద్యార్థులు, ఉద్యమకారులు తెలంగాణ మంత్రులపై తీవ్ర ఆగ్రహంతో ఉన్నారు. తెలంగాణ సాధనపై కాకుండా మంత్రి పదవుల కోసం కాంగ్రెసువారు తాపత్రయపడుతున్నారని విమర్సిస్తున్నారు.