వైయస్ జగన్ తో రాజకీయాలు మాట్లాడలేదు: వైయస్ వివేకానంద

హైదరాబాద్‌: తన సోదరుడు దివంగత వైయస్ రాజశేఖర రెడ్డి కుమారుడు వైయస్ జగన్ తో రాజకీయాలు మాట్లాడలేదని వ్యవసాయ శాఖ మంత్రి వైయస్ వివేకానంద రెడ్డి చెప్పారు. వైయస్ వివేకానంద రెడ్డి గురువారం ఉదయం వైయస్ జగన్ తో సమావేశమయ్యారు. వైయస్ వివేకానంద రెడ్డి జగన్ నివాసానికి వెళ్లారు. వారిరువురి మధ్య పది నిమిషాల పాటు చర్చలు జరిగాయి. తన చిన్నాన్న వైయస్ వివేకానంద రెడ్డితో గొడవలు లేవని, వివేకానంద రెడ్డి తమ కుటుంబసభ్యుడేనని వైయస్ జగన్ బుధవారం సాయంత్రం ఓ ప్రకటనలో వివరణ ఇచ్చారు. ఈ నేపథ్యంలో వివేకా జగన్ ను కలిశారు.

కుటుంబ సంబంధాలను కాపాడుకోవడానికే తాను వైయస్ జగన్ ను కలిసినట్లు వైయస్ వివేకానంద రెడ్డి భేటీ అనంతరం మీడియా ప్రతినిధులతో చెప్పారు. రాజకీయంగా వేర్వేరుగా ఉన్నప్పటికీ కుటుంబ సంబంధాలను కొనసాగించే విషయంపై వైయస్ జగన్ తో చెప్పినట్లు ఆయన తెలిపారు. కాగా, వైయస్ జగన్ అభిమానులు వైయస్ వివేకానంద రెడ్డిపై తీవ్ర ఆగ్రహం వ్యక్తం చేశారు. వైయస్ వివేకానంద రెడ్డి రాజీనామా చేయాలని, వైయస్ జగన్ కు అండగా నిలవాలని వారు డిమాండ్ చేశారు. ఈ మేరకు వారు నినాదాలు చేశారు.