కెవిపిపై ఆరోపణలకు కొండా సురఖపై కాంగ్రెసు ముప్పేట దాడి

హైదరాబాద్: రాజ్యసభ సభ్యుడు కెవిపి రామచందర్ రావుపై తీవ్ర ఆరోపణలు చేసిన వైయస్ జగన్ వర్గానికి చెందిన శాసనసభ్యురాలు కొండా సురేఖపై ముప్పేట దాడి జరుగుతోంది. కాంగ్రెసు నాయకులు కొండా సురేఖపై మండిపడుతున్నారు. దివంగత నేత వైయస్ రాజశేఖర రెడ్డికి మచ్చ తెచ్చే విధంగా సురేఖ ఆరోపణలున్నాయని వారన్నారు. కొండా సురేఖ వ్యాఖ్యలకు వైయస్సార్ ఆత్మ క్షోభిస్తుందని వారు విమర్శించారు. కొండా సురేఖవి వ్యక్తిగత విమర్శలని వారు అభిప్రాయపడ్డారు. వైయస్ పై ప్రేమ ఉన్నట్లుగా మాట్లాడుతూనే ఆయన జీవితానికి మచ్చ తెచ్చే విధంగా ఉందని అన్నారు.

సురేఖపై కాంగ్రెసు శాసనసభ్యులు, ఎమ్మెల్సీలు మల్లు భట్టి విక్రమార్క, మల్లాది విష్ణు, గండ్ర వెంకటరమణా రెడ్డి, దుర్గేష్, రౌతు సూర్యప్రకాశ రావు, పార్లమెంటు సభ్యుడు రాజయ్య తీవ్రంగా ధ్వజమెత్తారు. సీనియర్ పార్లమెంటు సభ్యుడు కెవిపిపై కొండా సురేఖ ఆరోపణలు చేయడం దారుణమని పార్లమెంటు సభ్యుడు రాజయ్య అన్నారు. కొండా సురేఖ వ్యాఖ్యలు తిన్నింటి వాసాలు లెక్కపెట్టినట్లుగా ఉందని ఆయన అన్నారు. కొండా సురేఖ వ్యాఖ్యలకు మూలాలు ఎక్కుడున్నాయో తేలాలని రౌతు సూర్యప్రకాశ రావు అన్నారు. కొండా సురేఖపై చర్యలు తీసుకోవాలని దుర్గేష్ డిమాండ్ చేశారు.