విద్యార్థులపై కేసుల ఎత్తివేతకు మజ్లీస్ ఎమ్మెల్యే అక్బరుద్దీన్ కొలికి

హైదరాబాద్: సమైక్యాంధ్ర, తెలంగాణ విద్యార్థులపై కేసుల ఎత్తివేతకు ముస్లిం యువకులపై కేసుల నమోదుకు మజ్లీస్ శాసనసభ్యుడు అక్బరుద్దీన్ ఓవైసీ ముడిపెట్టారు. సమైక్యాంధ్ర, తెలంగాణ ఉద్యమాల సందర్భంగా విద్యార్థులపై కేసులు ఎత్తేసినప్పుడు ముస్లిం యువకులపై పెట్టిన కేసులను కూడా ఎత్తేయాలని ఆయన అన్నారు. విద్యార్థులపై నమోదైన కేసులపై హోం మంత్రి సబితా ఇంద్రారెడ్డి ప్రకటన చేసిన తర్వాత జరిగిన చర్చలో సోమవారం ఆయన పాల్గొన్నారు. ముస్లిం యువకులపై పెద్ద యెత్తున కేసులు పెట్టారని ఆయన ఆరోపించారు. అవన్నీ అక్రమ కేసులేనని ఆయన అన్నారు. మక్కా మసీదులో పేలుడు సంభవించిన తర్వాత ముస్లిం యువకులపై పెద్ద యెత్తున కేసులు పెట్టారని ఆయన అన్నారు.

హైదరాబాదులోని పాతబస్తీ ముస్లిం యువకులు కూడా తెలంగాణవారేనని, తెలంగాణ విద్యార్థులపై పెట్టిన కేసులు ఎత్తేసినప్పుడు తెలంగాణలో పెట్టిన కేసులన్నింటినీ ఎత్తేయాలని ఆయన అన్నారు. తనపై కూడా కేసు నడుస్తోందని ఆయన చెప్పారు. తెలంగాణ ప్రజలను సంతోషపెట్టడానికి ప్రభుత్వం కేసులు ఎత్తేస్తోందని ఆయన అన్నారు. ఈ కేసుల ఎత్తవేతపై ఎవరైనా కోర్టుకు వెళ్లి స్టే తెస్తే పరిస్థితి తీవ్రమవుతుందని, దానితో తెలంగాణలో మరింత అలజడి చెలరేగుతుందని ఆయన అన్నారు. డిసెంబర్ 31వ తేదీ తర్వాత ఏ విధమైన చట్టవ్యతిరేక కార్యకలాపాలు జరగని రీతిలో కేసుల ఉపసంహరణ ఉండాలని ఆయన అన్నారు.