కెసిఆర్ ముందు నీ భాష మార్చుకో: మల్లు భట్టి విక్రమార్క సూచన

హైదరాబాద్: మహా గర్జనలో తెలంగాణ రాష్ట్ర సమితి అధ్యక్షుడు కె చంద్రశేఖరరావు తమ నాయకులపై చేసిన వ్యాఖ్యలపై తెలంగాణ కాంగ్రెస్ నాయకులు తీవ్ర ఆగ్రహం వ్యక్తం చేశారు. శుక్రవారం మల్లు భట్టి విక్రమార్క, గండ్ర వెంకటరమణారెడ్డి కాంగ్రెస్ పార్టీ కార్యాలయంలో విలేకరులతో మాట్లాడారు. కె చంద్రశేఖరరావు ముందు తన భాషను మార్చుకోవాల్సి ఉందన్నారు. తోటి సభా నాయకులను ఎలా గౌరవించాలో తెలియని కెసిఆర్ కాంగ్రెస్ వారిని విమర్శించటం విడ్డూరమన్నారు. ప్రజాప్రతినిధులను గౌరవించటం ఆయన నేర్చుకోవాల్సి ఉందన్నారు. కేసిఆర్ చేతకానివాడన్నారు.

ప్రజల బాధలను, ప్రకృతి వైపరీత్యాలను అడ్డుగా పెట్టుకొని మళ్లీ అధికారంలోకి రావాలని తెలుగుదేశం పార్టీ అధ్యక్షుడు చంద్రబాబునాయుడు కలలు కంటున్నారని ఎద్దేవా చేశారు. ఆయన కన్ను ప్రస్తుతం ముఖ్యమంత్రి పీఠంపైనే ఉందన్నారు. రాజకీయ లబ్ధికోసమే చంద్రబాబు దీక్ష చేపట్టడం విచారమన్నారు.

కెసిఆర్ మంచి వాతావరణాన్ని చెడగొడుతున్నారని కాంగ్రెస్ పార్లమెంటు సభ్యుడు పొన్నం ప్రభాకర్ అన్నారు. తెలంగాణకు బాగా అనుకూలంగా ఉన్న ఇలాంటి పరిస్థితుల్లో కెసిఆర్ రెచ్చగొట్టేలా వ్యాఖ్యలు చేయటం దురదృష్టకరమన్నారు. తెలంగాణ తెచ్చినా తేకపోయినా కాంగ్రెస్ దే బాధ్యత అన్నారు. తెలంగాణ కాంగ్రెస్ నాయకులను ఏమైనా అంటే ఊరుకునేది లేదన్నారు.