వైఎస్ ఆ ఫైలుపై ఎందుకు సంతకం చేయలేదు: జగన్ ను ప్రశ్నించిన బొత్స

హైదరాబాద్: దివంగత ముఖ్యమంత్రి వైఎస్ రాజశేఖరరెడ్డి ముఖ్యమంత్రి కాగానే రైతులకు ఉపయోగపడే 9 గంటల విద్యుత్ ఫైలుపైన సంతకం ఎందుకు చేయలేదో మాజీ పార్లమెంటు సభ్యుడు వైఎస్ జగన్మోహన్ రెడ్డి స్పష్టం చేయాలని మంత్రి బొత్స సత్యనారాయణ శుక్రవారం డిమాండ్ చేశారు. తొమ్మిది గంటల విద్యుత్ గురించి ఆయన మాట్లాడటం సరికాదన్నారు. సాధ్యాసాధ్యాలు పరిశీలించిన తర్వాతనే దానిని ఆలోచించాల్సి ఉంటుందన్నారు.

ప్రతి ఒక్కరికి నిరాహార దీక్ష చేస్తామని అనడం పరిపాటి అయిపోయిందన్నారు. జగన్ నిరాహార దీక్ష ఎందుకు చేస్తున్నారో వివరంగా చెప్పాలని డిమాండ్ చేశారు. నిరాహార దీక్షకు కూర్చునే ముందు జగన్ తన కోరికలు ఏమిటో చెబితే స్పష్టమైన సమాధానాలిస్తామన్నారు. తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడు రైతులపై కపట ప్రేమను కనపరుస్తున్నారన్నారు. తొమ్మిదేళ్లు రాష్ట్రాన్ని పాలించిన చంద్రబాబు రైతులకు గురించి ఏనాడు పట్టించుకోలేదన్నారు.