వైఎస్ జగన్మోహన్ రెడ్డిది నియంతల దారి: పాలడుగు వెంకట్రావు

హైదరాబాద్: మాజీ పార్లమెంటు సభ్యుడు, దివంగత ముఖ్యమంత్రి రాజశేఖరరెడ్డి తనయుడు వైఎస్ జగన్మోహన్ రెడ్డి నియంతలు నడిచిన దారిలో నడుస్తున్నారని కాంగ్రెస్ సీనియర్ నాయకుడు పాలడుగు వెంకటరావు శుక్రవారం ధ్వజమెత్తారు. జగన్ ఈ 21, 22 తేదీలలో కృష్ణా నది తీరంలో చేపడుతానంటునన్న నిరాహార దీక్ష రైతుల ప్రయోజనాల కోసం కాదని, కేవలం రాజకీయ ప్రయోజనాల కోసమేనన్నారు. జగన్ దీక్షతో రైతులకు కలిగే ప్రయోజనాలు ఏమీ లేవన్నారు. ఆయన తన సొంత ప్రయోజనాల కోసమే దీక్షకు పూనుకున్నారన్నారు.

మాజీ ముఖ్యమంత్రి కొణిజెటి రోశయ్యకు గానీ, ఇప్పటి ముఖ్యమంత్రి కిరణ్ కుమార్ రెడ్డికి గానీ పరిపాలన చేసుకునే అవకాశమే ఇవ్వడం లేదన్నారు. రాజకీయాల్లో ఇంత దూకుడు ఉంటే ఎలా అని ప్రశ్నించారు. మాజీ ముఖ్యమంత్రి, తెలుగుదేశం పార్టీ అధ్యక్షుడు నారా చంద్రబాబునాయుడు తనను ప్రజలు మరిచిపోతారనే నిరవధిక దీక్షను చేపట్టారన్నారు. రైతుల సమస్యలపై పోరాటం మాని దీక్ష పేరుతో రాజకీయ లబ్ది కోసం పాకులాడటం సరికాదన్నారు. చంద్రబాబు దీక్ష దివాళాకోరుతనానికి నిదర్శనమన్నారు.