రాహుల్ గాంధీ హిందూ టెర్రరిజం వ్యాఖ్యలపై భాజపా, ఆరెస్సెస్ ఫైర్

న్యూఢిల్లీ: దేశానికి ముస్లింలతో అనుబంధం ఉన్న టెర్రరిస్టుల కంటే హిందూ అతివాద సంస్థలతోనే తీవ్ర పరిణామాలు ఉన్నాయని భావి ప్రధానిగా భావిస్తున్న రాహుల్ గాంధీ అనడంపై భారతీయ జనతా పార్టీ, రాష్ట్రీయ స్వయం సేవక సంఘ్ తీవ్ర ఆగ్రహం వ్యక్తం చేసింది. హిందూ తీవ్రవాదం ప్రమాదకరంగా పరిణమించిందని అమెరికా విదేశాంగ మంత్రి హిల్లరీ క్లింటన్ తో భారత ప్రధాని మన్మోహన్ సింగ్ ఇచ్చిన విందు సందర్భంగా అన్నట్టు వికీలీక్స్ బయట పెట్టిన విషయం తెలిసిందే.

దీనిపై భాజాపా తీవ్ర అభ్యంతరం వ్యక్తం చేసింది. భారతదేశ పరిస్థితులపై కాంగ్రెస్ యువనేత రాహుల్ గాంధీకి ఏమాత్రం అవగాహన లేదని ధ్వజమెత్తింది. తీవ్రవాదం విషయంలో ప్రజలను, దేశాన్ని తప్పుదారి పట్టించేందుకు కాంగ్రెస్, రాహుల్ గాంధీ ప్రయత్నాలు చేస్తున్నాయని పేర్కొంది. రాహుల్ వ్యాఖ్యలు తీవ్ర అభ్యంతరకరమని ఆరెఎస్సెస్ నేత రాంమాధవ్ అన్నారు. రాహుల్ వ్యాఖ్యలు పాకిస్తాన్ కు ఊతమిచ్చేలా ఉన్నాయన్నారు. రాహుల్ మానసికంగా ఎదగలేదన్నారు.