జై బోలో తెలంగాణకు సర్టిఫికెట్ ఇవ్వకుంటే సినిమాల విడుదలను అడ్డుకుంటాం

హైదరాబాద్: ఎన్ శంకర్ దర్శకత్వం వహించిన జై బోలో తెలంగాణకు గురువారం సాయంత్రంలోగా సెన్సార్ సర్టిఫికెట్ ఇవ్వాలని తెలంగాణ ఎగ్జిబిటర్లు, డిస్ట్రిబ్యూటర్లు డెడ్‌లైన్ విధించారు. సాయంత్రంలోగా జై బోలో తెలంగాణకు సెన్సార్ సర్టిఫికెట్ ఇవ్వకపోతే రేపటి నుంచి సినిమాల విడుదలను అడ్డుకుంటామని వారు హెచ్చరించారు. ప్రస్తుతం విడుదలైన సినిమాలను ఆడనివ్వాలని, సినిమాల ప్రదర్శనను అడ్డుకోవద్దని తెలంగాణ ఫిల్మ్ ఛేంబర్ చైర్మన్ విజయేందర్ రెడ్డి తెలంగాణవాదులను కోరారు. ప్రస్తుతం ఆడుతున్న సినిమాల ప్రదర్శనను అడ్డుకుంటే నష్టపోయేది తెలంగాణ డిస్ట్రిబ్యూటర్లు, ఎగ్జిబిటర్లేనని ఆయన గురువారం మీడియా ప్రతినిధులతో చెప్పారు.

జై బోలో తెలంగాణ సినిమాకు సాయంత్రంలోగా సెన్సార్ సర్టిఫికెట్ ఇవ్వకపోతే తామే రేపటి నుంచి సినిమాల విడుదలను అడ్డుకుంటామని, తమపై విశ్వాసం ఉంచి ప్రస్తుతం నడుస్తున్న సినిమాలను తెలంగాణవాదులు ఆడనివ్వాలని ఆయన అన్నారు. జై బోలో తెలంగాణకు సెన్సార్ బోర్డు అభ్యంతరాలు చెప్పడంపై తీవ్రంగా ఆగ్రహించిన తెలంగాణవాదులు మంగళవారం రాత్రి నుంచి తెలంగాణ ప్రాంతంలో సినిమాల ప్రదర్శనను అడ్డుకుంటున్నారు. బుధవారం విడుదలైన గోపీచంద్ వాంటెడ్ సినిమా ప్రదర్శనకు తీవ్ర ఆటంకాలు ఎదురయ్యాయి.