జగన్ కంటే చిరంజీవికే ఆదరణ, చిరు పదవుల గూర్చి ఆలోచించొద్దు: విహెచ్

హైదరాబాద్: మాజీ పార్లమెంటు సభ్యుడు జగన్మోహన్ రెడ్డికంటే ప్రజారాజ్యం వ్యవస్థాపక అధ్యక్షుడు మెగాస్టార్ చిరంజీవికే ఎక్కువ ప్రజాధరణ ఉందని కాంగ్రెస్ పార్టీ సీనియర్ రాజ్యసభ సభ్యుడు వి హనుమంతరావు ఆదివారం అన్నారు. చిరంజీవి తన ప్రజారాజ్యం పార్టీని కాంగ్రెస్ పార్టీలో విలీనం చేసిన తర్వాత పదవుల గురించి ఆలోచించకూడదని విజ్ఞప్తి చేశారు. చిరు కాంగ్రెస్ పార్టీని బలోపేతం చేయడానికే మొదటి ప్రాధాన్యత ఇవ్వాలన్నారు. చిరు పార్టీ బలోపేతంపై దృష్టి పెడితే కాంగ్రెస్ మరింత బలపడుతుందని అన్నారు.

కాంగ్రెస్‌లోకి చిరంజీవి రాకతో పార్టీ రెడ్డి సామాజిక వర్గానికి కొంత దూరమవుతుందన్నారు. అయితే కొంతమంది వెళ్లినంత మాత్రాన సమస్య లేదన్నారు. ఆయన రాకతో కొందరు వెళ్లినప్పటికీ పార్టీకి ఎలాంటి నష్టం లేదన్నారు. చిరంజీవి కాంగ్రెస్‌లో చేరిన తర్వాత కాంగ్రెస్ నిర్ణయాలకు కట్టుబడి ఉండాలన్నారు. తెలంగాణపై ఏఐసిసి అధ్యక్షురాలు సోనియాగాంధీ తీసుకునే నిర్ణయానికి కట్టుబడాల్సి ఉంటుందన్నారు.