తెలంగాణపై చంద్రబాబు కొత్త డ్రామా: టిఆర్ఎస్ నేత జగదీశ్వర్

హైదరాబాద్: తెలుగుదేశం పార్టీ అధ్యక్షుడు చంద్రబాబునాయుడు తెలంగాణ అంశంపై కొత్త డ్రామాకు తెరతీస్తున్నారని తెలంగాణ రాష్ట్ర సమితి ఎమ్మెల్యే జగదీశ్వర్ రెడ్డి బుధవారం తెలంగాణ భవన్‌లో ఏర్పాటు చేసిన సమావేశంలో అన్నారు. తెలంగాణపై తీర్మానం పెట్టమని సీమాంధ్ర ఎమ్మెల్యేలను ప్రోత్సహిస్తూనే తెలంగాణ అంశం కేంద్రం పరిధిలో ఉందని చెబుతున్నారని ఇది ఎంత వరకు సమంజసమన్నారు. తెలుగుదేశం పార్టీని ప్రజలు విశ్వసించే పరిస్థితి లేదన్నారు. డ్రామాలతో ప్రజల విశ్వాసం పొందాలనుకుంటే కుదరదన్నారు. టిడిపి ఏదో ఒక నినాదంతో ప్రజల ముందుకు రావాలని ఆయన డిమాండ్ చేశారు. అయితే సమైక్యాంధ్ర లేదా తెలంగాణ నినాదంతో ప్రజల మధ్యకు రావాలని అన్నారు.

తెలంగాణ టిడిపి నేతలు ఇప్పటికైనా పార్టీని వదిలి బయటకు వచ్చి తెలంగాణ కోసం ఉద్యమించాలని చెప్పారు. తెలంగాణ ఐక్య కార్యాచరణ సమితి ఇచ్చిన పిలుపులో భాగంగా 48 గంటల బంద్‌ను విజయవంతం చేసినందుకు ఆయన ప్రజలకు ధన్యవాదాలు తెలిపారు. తెలంగాణ సమస్యకు కాంగ్రెస్ పార్టీదే బాధ్యత అని, అందులో ఎలాంటి సందేహం లేదన్నారు. అయితే టిడిపి కూడా ఒక పెద్ద సమస్యపై ప్రతిపక్షంగా ఒక నిర్ణయానికి రావాల్సిన అవసరం కూడా ఉందన్నారు. సీమాంధ్ర ఒక వర్గానికి చెందిన ఎంపీలే తెలంగాణను అడ్డుకుంటున్నారన్నారు. హైదరాబాద్‌లో ఉన్న వారి పెట్టుబడులు రక్షించుకోవడానికి వారు ఇలాంటి చర్యలకు పాల్పడుతున్నారన్నారు. తెలంగాణ సమస్యపై పార్లమెంటులో టిఆర్ఎస్ ఇవ్వాళ బాగా పోరాడిందన్నారు.

శాంతియుతంగా, మహాత్మాగాంధీ మార్గంలో నడుస్తున్న ఉద్యమాన్ని పోలీసులు దుర్మార్గంగా అణిచివేసేందుకు ప్రయత్నాలు చేస్తున్నారని టిఆర్ఎస్ నేత శ్రవణ్ కుమార్ ఆరోపించారు. విద్యార్థులను తీవ్రంగా బాధిస్తున్నారన్నారు. ఉద్యోగులు, విద్యార్థులు చేస్తున్న సహాయ నిరాకరణగు మద్దతుగా పోలీసులు కూడా గన్ డౌన్ చేయాలని ఆయన కోరారు.

English summary

TRS MLA Jagadeeshwar Reddy fired at TDP president Chandrababunaidu today at Telangana Bhavan media conference. He said Chandrababu opened doors for new drama on Telangana issue. He demanded chandrababu to come with clear stand, it may be Telangana or United Andhra Pradesh.