ఎంపీ పదవికి రాజీనామా వద్దని కెసిఆర్‌కు ఓయు జెఏసి సూచన

By Srinivas

Published: Friday, March 4, 2011, 15:38 [IST]

హైదరాబాద్: తెలంగాణ రాష్ట్ర సమితి అధ్యక్షుడు, మహబూబ్‌నగర్ పార్లమెంటు సభ్యుడు కల్వకుంట్ల చంద్రశేఖరరావు తన పార్లమెంటరీ సభ్యత్వానికి రాజీనామా చేయవద్దని ఉస్మానియా ఐక్య కార్యాచరణ సమితి శుక్రవారం విజ్ఞప్తి చేసింది. టిఆర్ఎస్ పార్టీ తరఫున కెసిఆర్, విజయశాంతి ఇద్దరు పార్లమెంటు సభ్యులు ఉన్నారన్నారు. తెలంగాణ కోసం వారి ఇద్దరే పార్లమెంటులో పోరాటం చేస్తున్నారన్నారు. ఇప్పుడు వారు కూడా రాజీనామాలు చేయాలని నిర్ణయం తీసుకుంటే పార్లమెంటులో తెలంగాణ కోసం పోరాటం చేసేవారు ఎవరూ ఉండరని అన్నారు. లోక్‌సభలో తెలంగాణపై పోరాడటం కోసమైనా కెసిఆర్ రాజీనామాకు పాల్పడకూడదని కోరారు.

కాగా ఇప్పటికే టిఆర్ఎస్ పార్టీ ఎంపీలు రాజీనామా చేస్తారని వార్తలు వస్తున్న నేపథ్యంలో పలువురు ఫోన్‌లు చేసి కెసిఆర్ రాజీనామాకు పాల్పడవద్దని కోరినట్లుగా తెలుస్తోంది. శుక్రవారం పార్లమెంటునుండి వాకవుట్ చేసిన తర్వాత కెసిఆర్ విలేకరులతో మాట్లాడుతూ ప్రజలలో తేల్చుకుంటామని కూడా హెచ్చరించారు. దీంతో ఆయన రాజీనామా చేసే అవకాశం ఉన్న దృష్ట్యా ఓయు జెఏసి రాజీనామా వద్దని కోరాయి.

Published On March 4, 2011